வெள்ளைரவைப் பாயாசம்

வெள்ளைரவைப் பாயாசம்

தேவையானவை :- வெள்ளை ரவை – கால் கப், பால் – 2 கப், தண்ணீர் – 1 கப், ஜீனி – 1 டேபிள் ஸ்பூன், உப்பு – 1 சிட்டிகை., ஏலக்காய் – 1 சிட்டிகை, நெய் – 2 டீஸ்பூன், கிஸ்மிஸ் – 10, பேரீச்சை – 2.

செய்முறை:- வெள்ளை ரவையை வெறும் வாணலியில் வறுத்து ஒரு டம்ளர் கொதிக்கும் நீரைச்சேர்க்கவும். வெந்தவுடன் உப்பு ஒரு சிட்டிகை சேர்க்கவும். நன்கு கிளறி கொதிக்கும் பாலையும் ஜீனியையும் சேர்க்கவும். ஜீனி கரைந்ததும் இறக்கி ஏலப்பொடி தூவவும். பேரீச்சையை விதை நீக்கிப் பொடியாக அரியவும். பேரீச்சையையும் கிஸ்மிஸையும் நெய்யில் பொறித்துப் போட்டுப் பரிமாறவும்.

எலுமிச்சைப் பானகம்

எலுமிச்சைப் பானகம்

தேவையானவை:- எலுமிச்சம்பழம் – 1, வெல்லம் – இரண்டு அச்சு. சுக்குத்தூள், ஏலக்காய்த்தூள் – தலா கால் டீஸ்பூன்.

செய்முறை:- எலுமிச்சம்பழத்தைச் சாறு எடுத்து வைக்கவும். வெல்லத்தை இரண்டு கப் தண்ணீரில் கரைத்துக் கொதி வந்ததும் இறக்கி வடிகட்டி ஆறவிடவும். இதில் சுக்குத்தூள், ஏலத்தூள் சேர்த்து ஆறியதும் எலுமிச்சைச் சாறு சேர்த்துக் கலக்கிப் பருகக் கொடுக்கவும்.

கேப்பைக் களி

கேப்பைக் களி

தேவையானவை:- கேப்பை மாவு – 2 கப், தண்ணீர் – 4 கப், உப்பு – ½ டீஸ்பூன்

செய்முறை:- கேப்பையை நீரில் கரைத்து அடுப்பில் வைத்துக் கிளறவும். முக்கால் பதம் வெந்ததும் உப்பு சேர்த்துக் கிளறி இன்னும் கெட்டியானதும் இறக்கி மூடி வைக்கவும். முருங்கைக்கீரைக்குழம்புடன் பரிமாறவும்.

கம்பங்கூழ்

கம்பங்கூழ்

தேவையானவை :- கம்பு – 2 கப், தண்ணீர் – 6 கப்

செய்முறை :- கம்பில் நீர் தெளித்து மிக்ஸியில்  சிறிது சிறிதாக வைப் செய்யவும். அதைக் கழுவித் தவிடு நீக்கவும். 6 கப் தண்ணீரில் வேகப்போடவும் . கொதிவந்ததும் அடக்கி வைக்கவும். கிளறிவிட்டு மூடிபோட்டு சிறுதணலில் வேகவைத்து இறக்கவும்.  வெய்யிலுக்கு இதமா இதைப் பிசைந்து உப்பு தயிர்போட்டு சின்ன வெங்காயம், பச்சைமிளகாய் சேர்த்து உண்ணலாம். தொட்டு சாப்பிட மாங்காய் ஊறுகாய், மோர்மிளகாய் வற்றலும் நன்றாக இருக்கும்.

அவல் தேங்காய் உருண்டை

அவல் தேங்காய் உருண்டை

தேவையானவை :- ரோஸ் அவல் – 2 கப், தேங்காய்த்துருவல் – 2 டேபிள் ஸ்பூன், தூள் வெல்லம் – 100 கி, ஏலத்தூள் – 1 சிட்டிகை, உப்பு – 1 சிட்டிகை.

செய்முறை:- ரோஸ் அவலை மிக்ஸியில் பொடிக்கவும். இதில் உப்பை சேர்த்து கால் கப் தண்ணீர் தெளித்துப் பிசறி ஐந்து நிமிடம் வைக்கவும். அதிலேயே ஏலத்தூள், தேங்காய்த்துருவல், தூள் வெல்லம் போட்டு நன்கு பிசைந்து உருண்டைகளாகப் பிடித்து நிவேதிக்கவும்.

அரியரிசி & துள்ளுமா

2.அரியரிசி

தேவையானவை:- பச்சரிசி – 1 கப், தூள் வெல்லம் – 100 கி

செய்முறை:- பச்சரிசியைக் களைந்து ஊறவைக்கவும். நன்கு ஊறியபின்  அரிசியைக் கல் இல்லாமல் அரித்து எடுத்துத் தூள் வெல்லம் கலந்து நிவேதிக்கவும்.

 

3.துள்ளுமா

தேவையானவை:- பச்சரிசி – 1 கப், அச்சு வெல்லம் – 100 கி,

செய்முறை:- பச்சரிசியைக் களைந்து ஊறவைக்கவும். ஊறவைத்த அரிசியை நீரில்லாமல் வடித்து எடுத்துப் பெரபெரவென உரலில் இடித்தோ மிக்ஸியில் அரைத்தோ வைக்கவும். இதில் அச்சுவெல்லத்தைத் தூள் செய்து ஒரு சுற்றுச் சுற்றி நிவேதிக்கவும். (உரலில் போட்டு இடிக்கும்போது குருணையுடன் துள்ளி விழும் என்பதால் இதன் பெயர் துள்ளுமா.)

மாவிளக்கு

1.மாவிளக்கு

தேவையானவை:- பச்சரிசி – 1 கப், மண்டை வெல்லம் – 100 கி. நெய் – 1 டேபிள் ஸ்பூன், திரி.

செய்முறை:- பச்சரிசியைக் களைந்து ஊறவைக்கவும். இரண்டு மணி நேரம் கழித்து அரிசியை நீரில்லாமல் வடித்து மிக்ஸியில் அரைத்துச் சலிக்கவும். மண்டை வெல்லத்தைத் துருவி மாவுடன் மிக்ஸியில் போட்டுச் சுற்றி எடுத்து உருண்டையாகக் கைகளால் உருட்டி ஒரு தட்டில் வைக்கவும். நடுவில் குழி செய்து திரி போட்டு நெய் ஊற்றி மாவிளக்கை ஏற்றி நிவேதிக்கவும்.

ஆடி மாதப் பிரசாதங்கள்

 ஆடி மாதப் பிரசாதங்கள்