புஸ்தகாவில் என் முதல் மின்னூல் . ”பெண்மொழி”

புஸ்தகாவில் என் முதல் மின்னூல் . ”பெண்மொழி”
புஸ்தகாவில் என் முதல் மின்னூல் . ”பெண்மொழி”

சனி, 31 டிசம்பர், 2016

சாக்லெட் அக்ரூட் பர்ஃபி - CHOCOLATE AKHROT BURFI.

சாக்லெட் அக்ரூட் பர்ஃபி

தேவையானவை:- அக்ரூட் – 1 கப், சர்க்கரை – முக்கால் கப், தண்ணீர் – 1 கப், ட்ரிங்கிங் சாக்லெட் – 2 டேபிள் ஸ்பூன், நெய் – 1 டீஸ்பூன்.

செய்முறை:- அக்ரூட்டை தோலுரித்து கொரகொரப்பாக பொடி செய்யவும். சர்க்கரையில் தண்ணீரை ஊற்றிப் பாகு வைக்கவும். பாகு கெட்டியானதும் ட்ரிங்கிங்க் சாக்லெட்டைத் தூவிக் கலந்து அதன் பின் அக்ரூட்டைக் கொட்டிக் கிளறவும். பாகு இறுகும்போது நெய் தடவிய தட்டில் கொட்டி வில்லைகள் போடவும்.

வெள்ளி, 30 டிசம்பர், 2016

பிங்க் கத்லி - PINK KATLI.

பிங்க் கத்லி :-


தேவையானவை:- பீட்ரூட் – 2, கேரட் – 1, முந்திரி – ஒரு கப், சர்க்கரை – ஒரு கப், நெய் – அரை கப்.

செய்முறை:- பீட்ரூட்டையும் கேரட்டையும் தோல் சீவி சன்னமாகத் துருவவும். முந்திரியை அப்படியே பொடிக்கவும். கால் கப் நெய் விட்டு பீட்ரூட் கேரட்டைப் பச்சை வாசம் போக வதக்கி இறக்கவும். முந்திரி சர்க்கரை கேரட் பீட்ரூட்டைச் சேர்த்து நன்கு கலக்கி அடுப்பில் வைத்துக் கிளறவும். ஒன்று சேர்த்ததும் மிச்ச நெய்யை ஊற்றி நன்கு உருட்டிக் கிளறி நெய் தடவிய தட்டில் கொட்டி சமப்படுத்தி டைமண்ட் ஷேப்பில் மெல்லிய வில்லைகளாக வெட்டி எடுக்கவும்.

வியாழன், 29 டிசம்பர், 2016

மில்கி நெஸ்ட் - MILKY NEST.

மில்கி நெஸ்ட்.:-


தேவையானவை:- புழுங்கலரிசி மாவு – ஒரு கப், மைதாமாவு – ஒரு கப், கண்டென்ஸ்ட் மில்க் – ஒன்றரை கப், நெய் – 2 கப், தோலோடு குச்சியாக நறுக்கிய பாதாம் – 2 டேபிள் ஸ்பூன், தோலுரித்த பிஸ்தா – 2 டேபிள் ஸ்பூன், டூட்டி ஃப்ரூட்டி – 4 டேபிள் ஸ்பூன். தோலுரித்த அக்ரூட் - 20

செய்முறை:- புழுங்கல் அரிசி மாவையும் மைதாமாவையும் கலந்து வெதுவெதுப்பான தண்ணீர் ஊற்றிப் பிசையவும். ஓமப்பொடி அச்சில் மாவை நிரப்பிக் கொள்ளவும். நெய்யைக் காயவைக்கவும். குழிவான காய்கறிக் கரண்டியில் பிழிந்து காயும் நெய்யில் கரண்டியோடு வேகவிடவும்.இன்னொரு குழிக்கரண்டியால் அழுத்தியபடி வேகவைத்து எடுத்து கூடுபோல கழட்டி வைக்கவும். இது போல எல்லா மாவையும் கூடு போல வேகவைத்து எடுத்து வைக்கவும். சாப்பிடும் போது கண்டென்ஸ்ட் மில்கை இரண்டு டீஸ்பூன் கூட்டின் உள்ளே தடவி அக்ரூட் வைத்து அதைச் சுற்றி சிறிது டூட்டி ஃப்ரூட்டி, பிஸ்தா, குச்சியாக நறுக்கிய பாதாம் தூவிக் கொடுக்கவும்.

புதன், 28 டிசம்பர், 2016

சுர்மா லாடு. CHURMA LADOO

சுர்மா லாடு :-


தேவையானவை;- கோதுமை மாவு – ஒன்றரை கப், ரவை – அரை கப், நெய் – 400 கி, கோவா – 150 கிராம், முந்திரி பாதாம் கிஸ்மிஸ் தலா – 50 கிராம். போரா – 400 கி,

செய்முறை:- கோதுமை மாவு, ரவையைக் கலந்து நூறுகிராம் நெய்யை உருக்கி ஊற்றி தண்ணீர் தெளித்துப் பிசைந்து ஒரு மணி நேரம் ஊறவைக்கவும். நெய்யைக் காயவைத்து எலுமிச்சை அளவு உருண்டைகள் எடுத்து கனமான தட்டை போல் தட்டிப் பொரித்தெடுக்கவும். ஆறியதும் மிக்ஸியில் பொடித்துக் கொள்ளவும். கோவாவையும் நெய்யில் வறுத்துப் பொடிக்கவும். அடி கனமான பாத்திரத்தில் நெய்யைச் சூடாக்கி முந்திரி பாதாம் கிஸ்மிஸைப் பொரித்து அதிலேயே கோவா, கோதுமை மாவு பொடித்தது, போரா ஆகியவற்றைப் போட்டு நன்கு கிளறி உருண்டைகள் பிடிக்கவும்.

திங்கள், 26 டிசம்பர், 2016

ஃபார்சி பூரி (பில்லாலு) - BILLALU.

ஃபார்சி பூரி (பில்லாலு).

தேவையானவை;- மைதா – 1 கப், நெய் – 3 டீஸ்பூன், பால் – 5 டீஸ்பூன், தண்ணீர் – 6 டீஸ்பூன், பொடித்த சர்க்கரை – கால் கப், ஏலத்தூள் – 1 சிட்டிகை, எண்ணெய் – பொரிக்கத் தேவையான அளவு.

செய்முறை:- பெரிய தட்டில் நெய்யைப் போட்டு நன்கு உரசவும். அதில் மைதாவையும் போட்டு நன்கு கலக்கவும். அதில் பாலும் தண்ணீரும் சேர்த்து கெட்டியாகப் பிசையவும். பெரிய சப்பாத்தியாகத் தேய்த்து பாட்டில் மூடியால் குட்டி குட்டி பூரியாக வெட்டி எண்ணெயில் பொரித்தெடுக்கவும் பொடித்த சர்க்கரையில் புரட்டி வைக்கவும்.

வெள்ளி, 23 டிசம்பர், 2016

ஃப்ரூட் & நட்ஸ் கச்சோரி, FRUITS & NUTS KACHORI

ஃப்ரூட் & நட்ஸ் கச்சோரி

தேவையானவை:- மைதா – 2 கப், நெய் – கால் கப், பேரிச்சை, கிஸ்மிஸ், டூட்டி ஃப்ரூட்டி – ஒரு கப், பாதாம் பிஸ்தா முந்திரி வறுத்து சின்னமாக ஒடித்தது ஒரு கப், தேன் – ஒரு டேபிள் ஸ்பூன். பொறிக்க – எண்ணெய் அல்லது நெய் தேவையான அளவு.

செய்முறை:- மைதாவில் நெய்யை உருக்கி ஊற்றி தண்ணீர் தெளித்து நன்கு கெட்டியாகப் பிசைந்து பதினைந்து நிமிடம் ஊறவைக்கவும். பேரீச்சையைப் பொடியாக நறுக்கி கிஸ்மிஸ் டூட்டி ஃப்ரூட்டி, சின்னமாக ஒடித்த பாதாம் பிஸ்தா முந்திரியுடன் சேர்த்து தேனைக் கலந்து வைக்கவும். மைதாவில் எலுமிச்சை அளவு எடுத்து கனமான கப் செய்து அதில் இந்த ஃப்ரூட் & நட்ஸ் கலவையை வைத்து மூடி கையாலேயே கனமான பூரி போல உள்ளங்கை அகலத்துக்குத் தட்டவும். எண்ணெய் அல்லது நெய்யைக் காயவைத்துப் பொரிக்கவும்.

வியாழன், 22 டிசம்பர், 2016

ஜோவர் லட்டு. ( சோள லட்டு ), JOWAR LADDU.

ஜோவர் லட்டு. ( சோள லட்டு )


தேவையானவை:- சோளமாவு – 2 கப், நெய் – அரை கப் , நாட்டுச் சர்க்கரை – ஒரு கப், பால் – சிறிது.

செய்முறை:- அடி கனமான வாணலியில் நெய் ஊற்றி சோளமாவைப் போட்டு இளந்தீயில் பத்து நிமிடம் பொன்னிறமாக வறுக்கவும். இறக்கும் போது தீயை அதிகப்படுத்தி இறக்கி நாட்டுச் சர்க்கரையைச் சேர்க்கவும். இறக்கி வைத்து நன்கு கிளறினால் சர்க்கரை இளகி வரும். மாவில் எலுமிச்சை அளவு எடுத்து பால் தொட்டு உருண்டைகள் பிடிக்கவும்.

கம்பு அதிரசம். ( பாஜ்ரா - சாஜ பூரிலு), BAJRA - SAJJA BOORELU,

கம்பு அதிரசம். ( பாஜ்ரா -  சாஜ பூரிலு)


தேவையானவை:- கம்பு மாவு – 1 கப், அரிசி மாவு – 1 கப், வெல்லம் – ஒன்றரை கப், ஏலத்தூள் – 1 சிட்டிகை, எண்ணெய்- பொரிக்கத் தேவையான அளவு.

செய்முறை:- கம்புமாவையும் அரிசிமாவையும் சேர்த்துக்கலந்து வைக்கவும். வெல்லத்தில் தண்ணீர் ஊற்றிப் பாகு செய்து மாவில் ஊற்றி ஏலத்தூள் போட்டு இளக்கமாகப் பிசைந்து வைக்கவும். மூன்று மணி நேரம் ஊறியபிறகு எண்ணெயைக் காயவைத்து  எலுமிச்சை அளவு உருண்டைகள் எடுத்து மெல்லிய அதிரசங்களாகத் தட்டி எண்ணெயில் பொறித்தெடுக்கவும்.

செவ்வாய், 20 டிசம்பர், 2016

ஸேப் பாதாம் அல்வா. SEB BADAM HALWA

ஸேப் பாதாம் அல்வா :-

தேவையானவை :- ஆப்பிள் – 2, பாதாம் – 1 கப், சர்க்கரை – 1 கப், நெய் – 1 கப், கிராம்பு – 1, ஏலக்காய் – 2 பொடிக்கவும், கண்டென்ஸ்ட் மில்க் – 1 கப். குங்குமப் பூ – 1 சிட்டிகை.

செய்முறை:- பாதாமை வெந்நீரில் இரண்டு நிமிடங்கள் ஊறவைத்துத் தோலுரித்து கண்டென்ஸ்ட் மில்க் சேர்த்து அரைக்கவும். ஆப்பிளைத் தோல் சீவித் துருவி சிறிது நெய்யில் வதக்கி சர்க்கரை சேர்க்கவும். இதில் பாதாம் விழுதையும் போடவும். நன்கு சுருண்டு வெந்து வரும்போது கிராம்பையும் பொடித்த ஏலக்காயையும் சேர்த்து நெய்யை உருக்கி சிறிது சிறிதாக ஊற்றியபடி கிளறவும். அடுப்பை அணைத்துவிட்டு மிச்ச நெய்யையும் உருக்கி ஊற்றிக் கிளறி ஒட்டாத பதம் வந்ததும் குங்குமப்பூவைப் போட்டுப் பரிமாறவும்.

ட்ரைஃப்ரூட் பர்ஃபி, DEY FRUIT BURFI

ட்ரைஃப்ரூட் பர்ஃபி:-

தேவையானவை:- விதையில்லா பேரீச்சம்பழம் – 200 கி, உலர்ந்த அத்திப்பழம் – 6, கிஸ்மிஸ் – 1 டேபிள் ஸ்பூன், பாதாம் – கால் கப், முந்திரி – கால் கப், பிஸ்தா – கால்கப், வால்நட் – கால் கப், தேங்காய்ப் பொடி – 2 டேபிள் ஸ்பூன், வெள்ளை எள்ளு – 1 டேபிள் ஸ்பூன், தேங்காய் எண்ணெய்/நெய் – 1 டீஸ்பூன், 2 டீஸ்பூன் ரோஸ் வாட்டர்.

செய்முறை:- அத்திப்பழத்தையும் கிஸ்மிஸையும் வெந்நீரில் ஊறவைத்து தோல் இருந்தால் உரித்துக் கொள்ளவும். பாதாம், பிஸ்தா, முந்திரி, வால்நட், நான்கையும் மிக்ஸியில் போட்டு கொரகொரப்பாகப் பொடித்துக் கொள்ளவும். அதை எடுத்ததும் பேரீச்சம்பழம், அத்திப்பழம், கிஸ்மிஸைப் போட்டு நைஸாக அரைக்கவும். தேங்காய் எண்ணெய் அல்லது நெய்யைக் காயவைத்து வெள்ளை எள்ளைப் பொரிக்கவும்.. பொரிந்ததும் தேங்காப் பொடியைப் போட்டுப் புரட்டவும். இதில் பொடித்த ட்ரை ஃப்ரூட்ஸைப் போடவும். மிதமான தீயில் மூன்று நான்கு நிமிடங்கள் நன்கு புரட்டி அரைத்த பேரீச்சைக் கலவையைப் போடவும். நன்கு கிளறி சுருண்டதும் தட்டில் கொட்டி பர்பியாக துண்டுகள் போடலாம். அல்லது ஒரு தட்டில் போட்டு உருளையாக உருட்டி ஒரு இன்ச் அளவு துண்டுகள் செய்து எடுத்து வைக்கலாம்.

திங்கள், 19 டிசம்பர், 2016

ஃப்ரூட்டி ஃபிர்னி, FROOTY FIRNI,

ஃப்ரூட்டி ஃபிர்னி:-


தேவையானவை:- பால் – 3 கப்,  அவல் – முக்கால் கப், கார்ன் ஃப்ளோர் – 1 டேபிள் ஸ்பூன், சர்க்கரை – 1 டேபிள் ஸ்பூன், துண்டு  செய்த பழங்கள். – வாழைப்பழம், ஆப்பிள். ஒரு கப்., சில்வர் ஃபாயில் – 1

செய்முறை:- அவலை நன்கு வறுத்துக் கொரகொரப்பாகப் பொடிக்கவும். பாலைக் கொதிக்கவைத்து அதில் அவலைச் சேர்க்கவும்.நன்கு வெந்ததும் கார்ன்ஃப்ளோரைப் பாலில் கரைத்து ஊற்றவும். கொதி வந்ததும் சர்க்கரை சேர்த்துக் கரைந்ததும் இறக்கவும். ஆறு கப்புகளில் ஊறி ஆறியதும் கெட்டியாக இருக்கும் இதில் துண்டு செய்த பழங்களைப் போட்டு சில்வர் ஃபாயிலால் சுற்றி ஃப்ரிட்ஜில் குளிரவைத்துப் பரிமாறவும்.

ஞாயிறு, 18 டிசம்பர், 2016

ஆக்ரா ஸ்வீட் – அங்கூரி பேடா.AGRA SWEET-ANGOORI BEDA

ஆக்ரா ஸ்வீட் – அங்கூரி பேடா.


தேவையானவை:- பூசணிக்காய் – பாதி, சர்க்கரை – 3 கப், சோடாப்பூ – கால் டீஸ்பூன், தண்ணீர் – 2 கப். குங்குமப் பூ – 1 சிட்டிகை, பொடித்த தேங்காய் – 1 டேபிள் ஸ்பூன். 

செய்முறை:- பூசணிக்காயைத் தோல் சீவி சதுரத் துண்டுகளாக நறுக்கி சோடாப்பூ போட்டு நன்கு பிரட்டி தண்ணீரைப் பிழிந்து வைக்கவும். சர்க்கரையைத் தண்ணீரில் போட்டு பாகு காய்ச்சவும். இதில் பூசணிக்காய்த் துண்டுகளைப் பிழிந்து போட்டு வேகவிடவும். குங்குமப்பூவையும் போட்டு நன்கு வெந்து பாகு சுண்டியதும் இறக்கி அங்கூரி பேடாவைத் தேங்காய்ப் பொடியில் புரட்டி வைக்கவும்.

வெள்ளி, 16 டிசம்பர், 2016

மலாய் சந்தேஷ், MALAI SANDESH.

மலாய் சந்தேஷ்:-


தேவையானவை:- பனீர் – 200 கிராம், கண்டென்ஸ்ட் மில்க் – ஒரு டின், கெட்டிப் பால் – 1 டேபிள் ஸ்பூன், பொடித்த சர்க்கரை – 1 டேபிள் ஸ்பூன், மைதா – அரை டேபிள் ஸ்பூன், பால் – 2 கப், கார்ன் ஃப்ளோர் – 1 டீஸ்பூன், ஏலக்காய் – 2, சில்வர் ஃபாயில் பேப்பர் – 1.

செய்முறை:- பனீருடன் அரை டின் கண்டென்ஸ்ட் மில்க், கெட்டிப் பாலுடன் பொடித்த சர்க்கரை, மைதா சேர்த்து அடித்து அடி கனமான பாத்திரத்தில் போட்டுக் கிண்டவும். 20 நிமிடங்களில் இறுகியதும் இறக்கி கை பொறுக்கும் சூட்டில் உருண்டைகளாக உருட்டி லேசாகத் தட்டி ஒரு நெய் தடவிய ட்ரேயில் அடுக்கவும். மலாய் செய்வதற்கு 2 கப் பாலுடன் மிச்ச அரை டின் கண்டென்ஸ்ட் மில்கை ஊற்றிக் கொதிக்க விடவும். ஏலத்தூள் சேர்க்கவும். சிறிது தண்ணீரில் கார்ன் ஃப்ளோரைக் கரைத்துச் சேர்க்கவும். மூன்று நிமிடம் கொதிக்க வைத்து இறக்கவும். அடுக்கி இருக்கும் சந்தேஷில் இந்த மலாய்க் கலவையை ஊற்றி சில்வர் பாயில் போட்டு ஃப்ரிட்ஜில் குளிரவைத்துப் பரிமாறவும்.

புதன், 14 டிசம்பர், 2016

சுக்டி ( வெல்ல பாப்டி), SUKHDI .( JAGGERY PAPDI )

சுக்டி ( வெல்ல பாப்டி) :-

தேவையானவை:- கோதுமை மாவு – 1 கப், பொடித்த வெல்லம் – முக்கால் கப், நெய் – அரை கப், உடைத்த வேர்க்கடலை – கால் கப், ஏலத்தூள் – ஒரு சிட்டிகை, வெள்ளரி விதை – ஒரு கைப்பிடி.

செய்முறை:- அடிகனமான பாத்திரத்தில் நெய்யை சூடு செய்து கோதுமை மாவைப் போட்டு சிம்மில் கைவிடாமல் பத்து நிமிடம் வரை வறுக்கவும்.தீயை அதிகமாக்கி அடுப்பை அணைத்துவிட்டு அதில் வெல்லத்தைப் போட்டு நன்கு கிளறவும். சூட்டில் உருண்டு வரும்போது உடைத்த வேர்க்கடலை, ஏலத்தூள், வெள்ளரி விதை போட்டு நன்கு கிளறி நெய் தடவிய தட்டில் கொட்டி ஒரு நிமிடம் கழித்து சதுர வில்லைகள் போடவும். 

செவ்வாய், 13 டிசம்பர், 2016

பின்னி, PINNI.

பின்னி:-


தேவையானவை:- வெள்ளை உருண்டை உளுந்து - 2 கப், வெள்ளை ரவை - கால் கப், கோதுமை மாவு - 2 டேபிள் ஸ்பூன், மாவா ( இனிப்பில்லாத கோவா ) - ஒன்றரை கப், நெய் - ஒன்றரைகப், பால் - அரை கப், சீனி - 2 கப் , பால் - 2 டேபிள் ஸ்பூன் ( கடைசியில் சேர்த்துப் பிசைந்து அச்சு உருண்டை செய்ய ) ,ஊறவைத்துத் தோலுரித்து குச்சியாகப் பொடித்த பாதாம் - கால் கப். சூர்யகாந்தி விதைகள் - 2 டேபிள் ஸ்பூன். உடைத்த பிஸ்தா - 1 டீஸ்பூன். ஏலப் பொடி - அரை டீஸ்பூன்.
செய்முறை :-வெள்ளை உருண்டை உளுந்தைக் கழுவி 2 மணி நேரம் ஊறவைக்கவும். சிறிது சிறிதாக அரை கப் பால் சேர்த்து நைஸாக அரைக்கவும். ஒரு பானில் பாதி நெய்யைக் காயவைத்து ரவையையும் அதன் பின் கோதுமை மாவையும் போட்டு பொன்னிறமாக ஆகும்வரை நிதானமான தீயில் வறுக்கவும். இதில் மாவாவைப் போட்டு லேசாகச் சிவந்து வரும்வரை கிளறவும். இதில் அரைத்த உளுந்து விழுதையும் போட்டுக் கிளறவும். நிதானமான தீயில் 30 நிமிடம் கிளறியதும் மாவு உருண்டு வரும்போது மிச்ச நெய்யைச் சேர்க்கவும். தொடர்ந்து கிளற மாவு பொன்னிறமாக உதிர்ந்து நன்கு வாசனை வரத் தொடங்கும். அதில் ஏலப்பொடியையும் சீனியையும் சேர்த்துக் கிளறவும். குச்சியாக நறுக்கிய பாதாமையும் 2 டேபிள் ஸ்பூன் பாலையும் கலந்து நன்கு பிசையவும். இதை சமமாகத் தட்டி வட்ட வட்டமான அச்சுகளினால் வெட்டி எடுத்து மேலே சூரிய காந்தி விதைகளையும் பொடித்த பிஸ்தாவும் தூவி பரிமாறவும்.

ஞாயிறு, 11 டிசம்பர், 2016

உண்டம்பொரி. UNDAM PORI.

உண்டம்பொரி :-

தேவையானவை:- கோதுமை மாவு – இரண்டரை கப், ஏலத்தூள் – கால் டீஸ்பூன், சர்க்கரை – அரை கப், பேக்கிங் சோடா – கால் டீஸ்பூன், பழுத்த வாழைப்பழம் – 1. தண்ணீர் தேவையான அளவு. எண்ணெய் – பொரிக்கத் தேவையான அளவு.

செய்முறை:- கோதுமை மாவில் ஏலத்தூள், சர்க்கரை, பேக்கிங் சோடா போட்டு நன்கு கலக்கவும். பழுத்த வாழைப்பழத்தை நன்கு மாவாக மசித்து கோதுமை மாவில் சேர்த்து நன்கு நீர் தெளித்துப் பிசைந்து மூன்று மணி நேரம் ஈரத்துணி போட்டு ஊறவைக்கவும். மாவு லேசாகப் பொங்கி இருக்கும். எண்ணெயைக் காயவைத்து எலுமிச்சை அளவு உருண்டைகள் எடுத்து மிதமான தீயில் பொன்னிறமாகப் பொரித்தெடுக்கவும்.

சனி, 10 டிசம்பர், 2016

கேரளா டயமண்ட் கட், KERALA DIAMOND CUT.

கேரளா டயமண்ட் கட்:-


தேவையானவை:- மைதா – 1 கப், சர்க்கரை – கால் கப் + 1 டேபிள் ஸ்பூன், நெய் – ஒரு டீஸ்பூன், பேக்கிங்க் சோடா – 1 சிட்டிகை, உப்பு – 1 சிட்டிகை, எண்ணெய் – பொரிக்கத் தேவையான அளவு.

செய்முறை:- சர்க்கரையை மிக்ஸியில் போட்டுப் பொடிக்கவும். ஒரு பௌலில் மைதாவைப் போட்டு அதில் சர்க்கரை, நெய், பேக்கிங்க் பவுடர், உப்பு சேர்த்து நன்கு கலக்கவும். இதில் தண்ணீரைத் தெளித்து மென்மையாகப் பிசைந்து பதினைந்து நிமிடம் ஈரத்துணி போட்டு ஊறவைக்கவும். நன்கு ஊறியதும் சப்பாத்தி போல இட்டு சோமாஸ் ஸ்பூனால் கீறி டைமண்டாக வில்லைகள் செய்து எண்ணெயைக் காயவைத்து மிதமான தீயில் பொரித்தெடுக்கவும்

வியாழன், 8 டிசம்பர், 2016

அஞ்சீர் ஹல்வா ( அத்திப்பழம் ) FIGS HALWA

அஞ்சீர் ஹல்வா ( அத்திப்பழம் )

தேவையானவை:- காய்ந்த அத்திப்பழம் – கால் கப், நெய் – 3 டேபிள் ஸ்பூன், ஆல்மோண்ட்ஸ்/பாதாம் – ஊறவைத்து தோலுரித்து பொடித்தது – அரை கப், சர்க்கரை – 4 டேபிள் ஸ்பூன், பால்பவுடர் – 5 டேபிள் ஸ்பூன், ஏலப்பொடி – கால் டீஸ்பூன், அலங்கரிக்க குச்சியாக நறுக்கப்பட்ட பாதாம் – 1 டேபிள் ஸ்பூன்.

செய்முறை:- ஒரு பானில் இரண்டு கப் தண்ணீர் ஊற்றிக் கொதிக்கும்போது காய்ந்த அத்திப்பழங்களைச் சேர்த்து 3, 4 நிமிடங்கள் வேகவிடவும். மென்மையானவுடன் வடிகட்டவும். மிக்ஸியில் வேகவைத்த அத்திப்பழங்களைப் போட்டு சிறிது நீர் ஊற்றி அரைத்து வைக்கவும். நெய்யை அடி கனமான பாத்திரத்தில் போட்டு சூடுபடுத்தவும். பொடித்த பாதாமைப்போட்டு இரண்டு நிமிடம் கிளறவும். இதில் அரைத்த அத்திப்பழ பேஸ்ட்., பால்பவுடர், சர்க்கரை போட்டு அரை கப் தண்ணீர் ஊற்றவும். 5 நிமிடம் விடாமல் கிளறவும். இறுகியதும் ஏலப்பொடி தூவி இறக்கி பாதாம் துருவல் தூவிப் பரிமாறவும்.

கல்கண்டு சாதம். KALKANDU RICE.

கல்கண்டு சாதம்:-

தேவையானவை:- பச்சரிசி – 1 கப், கல்கண்டு – 1 கப், நெய் – அரை கப், பால் – அரை கப், தண்ணீர் இரண்டு கப், ஜாதிக்காய்ப் பொடி – 1 சிட்டிகை, முந்திரி கிஸ்மிஸ் தலா – 10.

செய்முறை:- பச்சரிசியக் களைந்து பால் தண்ணீர் சேர்த்துக் குக்கரில் இரண்டு விசில்வரும்வரை வேகப்போடவும். கல்கண்டைப் பொடிக்கவும். குக்கரைத் திறந்து கல்கண்டைச் சேர்த்து நன்கு மசித்துக் கிளறவும். நெய்யை ஊற்றவும். சிறிது நெய்யில் முந்திரி கிஸ்மிஸைப் பொறித்துப் போட்டு ஜாதிக்காய்ப் பொடி தூவிக் கிளறி இறக்கி நிவேதிக்கவும்.

புதன், 7 டிசம்பர், 2016

வெல்லப்புட்டு. JAGGERY PUTTU.

வெல்லப்புட்டு:-

தேவையானவை:-புழுங்கல் அரிசி – 1 கப், துவரம் பருப்பு – 2 டீஸ்பூன், வெல்லம் – 2 கப், நெய் – 1 டேபிள் ஸ்பூன், முந்திரி கிஸ்மிஸ் – தலா 10, மஞ்சள்தூள், உப்பு தலா – 1 சிட்டிகை.

செய்முறை:- புழுங்கல் அரிசியை ஊறவைத்து நீரை இறுத்துப் பொடித்துச் சலிக்கவும். துவரம்பருப்பை ஊறவைக்கவும்.புழுங்கலரிசி மாவை வெறும் வாணலியில் சிவப்பாக வறுக்கவும். ஒரு கப் வெதுவெதுப்பான தண்ணீரில் மஞ்சள் தூள் போட்டு உப்பைச் சேர்க்கவும் . இந்தத் தண்ணீரை ஆறிய மாவில் போட்டுப் பிசறி வைக்கவும். இதில் துவரம்பருப்பைச் சேர்த்து ஆவியில் 20 நிமிடம் வேகவைத்து இறக்கவும். வெல்லத்தைத் தூள் செய்து முத்துப் பாகு வைத்து அதில் இந்தப் அரிசி பருப்புக் கலவையப் போடவும். நெய்யில் முந்திரி கிஸ்மிஸைப் பொரித்துப்போட்டுக் கலந்து வைக்கவும். ஆறியது உதிர் உதிராய் வாசனையாக இருக்கும் இந்தப் புட்டு.

வெள்ளி, 2 டிசம்பர், 2016

கொண்டைக்கடலை சுண்டல். CHANA SABUT SUNDAL.

கொண்டைக்கடலை சுண்டல் :-


தேவையானவை:- வெள்ளைக் கொண்டைக்கடலை அல்லது கறுப்புக் கொண்டைக்கடலை – 1 கப், தேங்காய்த்துருவல் – 1 டேபிள் ஸ்பூன், இஞ்சி – 1 டீஸ்பூன் துருவியது, வரமிளகாய் – 2 , கருவேப்பிலை – 1 இணுக்கு, உப்பு – அரை டீஸ்பூன், கடுகு உளுந்து எண்ணெய் தலா ஒரு டீஸ்பூன்.

செய்முறை:- வெள்ளை அல்லது கறுப்புக் கொண்டைக்கடலையை முதல்நாளே ஊறப்போடவும். மறுநாள் குக்கரில் உப்பு சேர்த்து நான்கு விசில் வேகவைக்கவும். எண்ணெயைக் காயவைத்துக் கடுகு உளுந்து இரண்டாகக் கிள்ளிய வரமிளகாய், இஞ்சி தாளித்துக் கருவேப்பிலை போடவும். கொண்டைக்கடலையைப் போட்டுக் கிளறி தேங்காய்த்துருவலைத் தூவி இறக்கவும். 

தேங்காய் சாதம், COCONUT RICE.

தேங்காய் சாதம்:-


தேவையானவை:- பாசுமதி அரிசி அல்லது சீரகச் சம்பா அரிசி அல்லது பச்சரிசி – 2 கப், தேங்காய்த்துருவல் – 2 கப், முந்திரிப் பருப்பு – 20, நெய் – 1 டேபிள் ஸ்பூன், வரமிளகாய் – 1, பச்சை மிளகாய் – 1, கருவேப்பிலை – 1 இணுக்கு, எண்ணெய், கடுகு, உளுந்து தலா – 1 டீஸ்பூன், கடலைப்பருப்பு, வேர்க்கடலை – தலா மூன்று டீஸ்பூன். உப்பு – அரை டீஸ்பூன்.

செய்முறை:- அரிசியைக் களைந்து இரண்டு கப் தண்ணீர் ஊற்றி சிறிது நெய் சேர்த்து குக்கரில் ஒரு விசில் வைத்து உதிராக வடித்துக் கொள்ளவும். எண்ணெயில் கடுகு உளுந்து கடலைப்பருப்பு, வேர்க்கடலை தாளித்து கருவேப்பிலை இரண்டாகக் கிள்ளிய வரமிளகாய் பச்சை மிளகாய் சேர்க்கவும். இதில் உப்பைச் சேர்த்து சாதத்தில் கொட்டவும். நெய்யில் தேங்காய்த் துருவலை வதக்கி அதில் தாளித்த சாதத்தைக் கொட்டிக் கிளறி நிவேதிக்கவும்.

வியாழன், 1 டிசம்பர், 2016

பிள்ளையார் முதல் அனுமன் வரை சிறப்பு பிரசாதங்கள். GANAPATHI - HANUMAN.

1.விநாயகர்

வரகரிசி வெல்லக் கொழுக்கட்டை

தேவையானவை:- வரகரிசி – 2 கப், பாசிப்பருப்பு – 1 கைப்பிடி, வெல்லம் – முக்கால் கப், தேங்காய்த்துருவல் – 1 டேபிள் ஸ்பூன், ஏலத்தூள் – 1 சிட்டிகை. உப்பு - 1 சிட்டிகை, நெய் – 2 டீஸ்பூன்.

செய்முறை:- வரகரிசியையும் பாசிப்பருப்பையும் லேசாக வறுத்துக் களைந்து காயவைத்து கொழுக்கட்டை மாவு பதத்தில் பொடித்து வைக்கவும். வெல்லத்தில் ஒன்றரை கப் தண்ணீர் ஊற்றிப் பாகுவைத்து வடிகட்டி மாவில் சேர்த்து தேங்காய்த்துருவல் போடவும். உப்பும், ஏலத்தூளும் போட்டு சிறிது நேரம் மூடிவைக்கவும். ஆறியதும் நெய் சேர்த்து நன்கு பிசைந்து இட்லிப் பாத்திரத்தில் ஆவியில் 20 நிமிடம் வேகவைத்து நிவேதிக்கவும்.

பச்சைப் பயறு அடை:-

தேவையானவை:- பச்சரிசி – 2 கப், பாசிப்பயறு – 1 கப், பச்சை மிளகாய்- 2, இஞ்சி – 1 இன்ச் துண்டு, கொத்துமல்லி – 1 கைப்பிடி, தேங்காய்த் துருவல், காரட் துருவல் – தலா 1 டேபிள் ஸ்பூன், உப்பு- அரை டீஸ்பூன், எண்ணெய்- 50 மில்லிகிராம்.

செய்முறை:- பச்சரிசியையும் பாசிப்பயறையும் தனித்தனியாக ஊறவைக்கவும். ( பாசிப்பயறை முளை கட்டியும் உபயோகிக்கலாம். ). பச்சை மிளகாய், உப்பு, இஞ்சி, கொத்துமல்லித் தழை சேர்த்து கொரகொரப்பாக அரைக்கவும். இதில் தேங்காய், காரட் துருவல் சேர்த்து சிறிது நேரம் வைக்கவும். தோசைக்கல்லில் அடையாகத் தட்டி எண்ணெய் விட்டுத் திருப்பிப் போட்டு மொறுமொறுப்பானதும் எடுத்து நிவேதிக்கவும்.

கடலைப்பருப்பு சுண்டல். CHANNA DHAL SUNDAL

கடலைப்பருப்பு சுண்டல்:-

தேவையானவை;- கடலைப்பருப்பு – 1 கப், தேங்காய்த்துருவல் -1 டேபிள் ஸ்பூன், தாளிக்க :- கடுகு, உளுந்து எண்ணெய் – தலா ஒரு டீஸ்பூன், வரமிளகாய் – 1, கருவேப்பிலை – 1 இணுக்கு. உப்பு – கால் டீஸ்பூன். பெருங்காயப் பொடி – 1 சிட்டிகை.

செய்முறை:- கடலைப்பருப்பைக் களைந்து சிறிது நேரம் ஊறவைக்கவும். கால் கப் நீரூற்றி குக்கரில் ஒரு விசில் வேகப்போடவும். எண்ணெயில் கடுகு உளுந்து இரண்டாகக் கிள்ளிய வரமிளகாய், கருவேப்பிலை பெருங்காயப்பொடி தாளித்து கடலைப்பருப்பைச் சேர்த்து உப்புப் போடவும். நன்கு கிளறி தேங்காய்த்துருவல் சேர்த்து இறக்கவும்.
Related Posts Plugin for WordPress, Blogger...