16.புரட்டாசி ராமர் பட்டாபிஷேகம்/ஏகாதசி – கோதுமை அப்பம்

16.புரட்டாசி ராமர் பட்டாபிஷேகம்/ஏகாதசி – கோதுமை அப்பம்

தேவையானவை :- கோதுமை – 1 கப், தூள் வெல்லம் – அரை கப், நெய் – பொரிக்கத் தேவையான அளவு

செய்முறை :- ஒரு பேசினில் கோதுமையையும் வெல்லத்தையும் போட்டு நன்கு கலக்கவும். தண்ணீரைத் தெளித்துத் தெளித்து இறுக்கமாகப் பிசையவும். நெய்யைத் தொட்டுக் கைகளால் அப்பம் அளவு தட்டி நெய்யைக் காயவைத்துப் பொரித்தெடுக்கவும்.

  

15.காரடையான் நோன்பு – வெல்ல அடை

15.காரடையான் நோன்பு – வெல்ல அடை

தேவையானவை:- பச்சரிசி – ஒருகப், வெல்லம் – 1 கப், காராமணி – கால் கப், தேங்காய்ப் பல் – கால் கப், ஏலப்பொடி – 1 சிட்டிகை

செய்முறை :- பச்சரிசியைக் களைந்து இரண்டு மணி நேரம் ஊறவைத்து நீரை வடித்து மிக்ஸியில் பொடித்துச் சலிக்கவும். காராமணியை வெறும் வாணலியில் லேசாக வறுத்து வைக்கவும். ஒரு கப் வெல்லத்தில் இரண்டு கப் தண்ணீர் ஊற்றி அடுப்பில் வைத்து கரையவிடவும். கரைந்ததும் காராமணியைப் போட்டு இரு நிமிடம் வேகவைத்து அதில் அரிசிமாவையும் போட்டுக் கிளறவும். நன்கு உருண்டு பந்து போலானதும் இறக்கி வைத்து ஆறவிடவும். ஆறியதும் எலுமிச்சை அளவு உருண்டைகள் எடுத்து உள்ளங்கையில் தட்டி வடை போல் துளை செய்து ஆவியில் வேகவைத்து நிவேதிக்கவும்.

  

14.வரலெட்சுமி விரதம் – எருக்கலங்கொழுக்கட்டை

14.வரலெட்சுமி விரதம் – எருக்கலங்கொழுக்கட்டை

தேவையானவை:- பச்சரிசி மாவு – 2 கப் , தேங்காய்த்துருவல் – ஒரு கப், வெல்லம் – அரை கப், ஏலக்காய்த்தூள் – கால் டீஸ்பூன்.

செய்முறை:- ஒன்றேகால் கப் தண்ணீரைக் கொதிக்கவைத்து ஒரு சிட்டிகை உப்பும் ஒரு டீஸ்பூன் நல்லெண்ணெயும் சேர்க்கவும். அதில் பச்சரிசி மாவைக் கொட்டிக் கரண்டிக் காம்பால் கிளறி மூடி வைக்கவும். பத்து நிமிடம் கழித்து மாவை கட்டியில்லாமல் நன்கு பிசைந்து வைக்கவும். தேங்காய்த்துருவலோடு வெல்லம் சேர்த்து வாணலியில் சுருளக் கிளறி ஏலப்பொடி போட்டு வைக்கவும். பிசைந்த மாவில் எலுமிச்சை அளவு உருண்டை எடுத்து சொப்புப் போல செய்து தேங்காய்ப் பூரணத்தை வைத்து மேலே கூம்பாக வரும்படி மூடவும். எல்லா மாவையும் இதுபோல் செய்து ஆவியில் பத்து நிமிடம் வேகவைத்து நிவேதிக்கவும்.

  

13.ஆவணி ஞாயிறு – குதிரைவாலி கற்கண்டு சாதம்.

13.ஆவணி ஞாயிறு – குதிரைவாலி கற்கண்டு சாதம்.

தேவையானவை :- குதிரைவாலி அரிசி – 1 கப், பால் – 1கப், தண்ணீர் – 2 கப், கற்கண்டு – 150 கி, நெய் – 50 கி. முந்திரி – 10.

செய்முறை:- குதிரைவாலி அரிசியை நன்கு களைந்து ஒரு கப் பாலும், 2 கப் தண்ணீரும் ஊற்றிக் குக்கரில் குழைய வேகவிடவும். கற்கண்டைப் பொடிக்கவும். குக்கரைத் திறந்து கற்கண்டுப் பொடியைப் போட்டு சூட்டோடு நன்கு கிளறவும். நெய்யைக் காயவைத்து முந்திரியைப் பொடித்துப் போட்டு மசியக் கிளறி நிவேதிக்கவும்.

  

12.விநாயக சதுர்த்தி – டூட்டி ஃப்ரூட்டி மோதகம்

12.விநாயக சதுர்த்தி – டூட்டி ஃப்ரூட்டி மோதகம்

தேவையானவை :- பச்சரிசிக் குருணை – கால் கிலோ, பாசிப்பருப்பு – ஒரு கைப்பிடி, வெல்லம் – 100 கி, தேங்காய் – ஒரு துண்டு, நெய் – ஒரு டேபிள் ஸ்பூன், ஏலப்பொடி – கால் டீஸ்பூன், டூட்டி ஃப்ரூட்டி – 25 கி.

செய்முறை:- பச்சரிசிக் குருணையையும் பாசிப்பருப்பையும் வெறும் வாணலியில் வாசம் வரும்வரை வறுக்கவும். மூன்று கப் தண்ணீரில் வெல்லத்தைத் தட்டிப் போட்டு சூடாக்கி வெல்லம் கரைந்ததும் குருணையில் வடிகட்டி ஊற்றி குக்கரில் ஒரு விசில் வரும்வரை வைக்கவும். தேங்காயைப் பல்லுப் பல்லாக நறுக்கியோ துருவலாகவோ செய்து நெய்யில் வதக்கி வெந்த மாவில் போடவும், ஏலப்பொடியையும் டூட்டி ஃப்ரூட்டியையும் சேர்த்து சிறிது ஆறியதும் நன்கு பிசைந்து உருண்டைகள் பிடித்து ஆவியில் பத்து நிமிடம் வேகவைத்து நிவேதிக்கவும்.