தினை சப்போட்டா பாயாசம்

தினை சப்போட்டா பாயாசம்

தேவையானவை:- தினை – 1 கப், பால் அரை – லிட்டர், சப்போட்டா – 2, சர்க்கரை – அரை கப், ஏலத்தூள் – 1 சிட்டிகை, நெய் – 2 டீஸ்பூன், பாதாம் , முந்திரி, கிஸ்மிஸ் – தலா - 6

செய்முறை:- தினையை லேசாக வறுத்து மிக்ஸியில் பொடிக்கவும். பாலைக் காய்ச்சவும். இதில் சிறிது எடுத்து ஆறவைக்கவும். சப்போட்டாவைத் தோலுரித்து கையால் மசித்து இந்தப்பாலில் சேர்க்கவும். மீதிப் பாலில் தினை மாவைப் போட்டு நன்கு கிளறி கொதிக்க விடவும். இரண்டு கொதி வந்ததும் சர்க்கரை சேர்த்துக் கரைந்ததும் இறக்கி ஆறவிடவும். நெய்யில் குச்சியாக நறுக்கிய பாதாம் முந்திரி கிஸ்மிஸைப் பொரித்துப் போடவும். ஆறியபின் இதில் சப்போட்டா கரைத்த பாலை ஊற்றி ஏலப்பொடி போட்டு நன்கு கிளறி ப் பரிமாறவும்.

தாமரைவிதைப் பாயாசம்

தாமரைவிதைப் பாயாசம்

தேவையானவை:- பால் – 1 லிட்டர், தாமரை விதை – 1 கப் ( நான்கு துண்டுகளாக நறுக்கவும்), முந்திரிப்பருப்பு – 20 ( நான்காக ஒடிக்கவும்), பாதாம் பருப்பு – 20 ( துண்டுகளாக கத்தியில் நறுக்கவும் ), கிஸ்மிஸ் – 2 டேபிள் ஸ்பூன், பிஸ்தா – 1 டேபிள் ஸ்பூன், கொப்பரை – பட்டையாக சீவியது 1 டேபிள் ஸ்பூன், சீனி – ½ கப், ஏலக்காய்த் தூள் – ½ டீஸ்பூன்

செய்முறை:- அடி கனமான பாத்திரத்தில் பாலை ஊற்றிக் காய்ச்சவும். பால் கொதிக்கும்போது நான்காக நறுக்கிய தாமரை விதை, பாதாம், பிஸ்தா, முந்திரி, கிஸ்மிஸ், பட்டையாகச் சீவிய கொப்பரை போட்டு வேக விடவும். அடிப் பிடிக்காமல் அடிக்கடி கிளறி விடவும்.சிறு தீயில் அரைமணி நேரம் வெந்ததும் சீனி சேர்க்கவும். சீனி கரைந்து கொதித்ததும் ஏலப்பொடி தூவிக் கலந்து இரண்டு நிமிடங்கள் மூடி வைத்துப் பரிமாறவும்.

வரகரிசிப் பாயாசம்

வரகரிசிப் பாயாசம்

தேவையானவை :- வரகரிசி – அரை கப், பாசிப்பருப்பு -  ஒரு டேபிள் ஸ்பூன், வெல்லம் – அரை கப், பால் – 1 கப், ஏலப்பொடி – 1 சிட்டிகை, முந்திரி கிஸ்மிஸ் – தலா 10. நெய் – 1 டீஸ்பூன்.

செய்முறை:- வரகரிசியைக் கழுவி அரைமணி நேரம் ஊறவைக்கவும். பாசிப்பருப்பை வறுத்து வரகரிசியில் போட்டுக் குக்கரில் இரண்டரை கப் தண்ணீர் விட்டு நான்கு விசில் சத்தம் வரும்வரை வேகவைக்கவும். வெந்ததும் நன்கு குழைத்து வெல்லம் போட்டுக்கொதிக்க விடவும். வெல்லம் கரைந்ததும் பால் ஊற்றி இறக்கி நெய்யில் முந்திரி கிஸ்மிஸ் வறுத்துப் போடவும்

பரங்கிக்காய் பாயாசம்

பரங்கிக்காய் பாயாசம்

தேவையானவை :- நன்கு கனிந்து சிவந்த பரங்கிக்காய் – 1 துண்டு, பால் – 4 கப், சர்க்கரை – முக்கால் கப், முந்திரி கிஸ்மிஸ் – தலா 10, ஏலப்பொடி – 1 சிட்டிகை, நெய் – 1 டேபிள் ஸ்பூன்.

செய்முறை:- முந்திரி கிஸ்மிஸை நெய்யில் வறுக்கவும். அதே நெய்யில் பரங்கிக்காயைத் துருவிப் போட்டு வறுக்கவும். ஒரு கப் பால் ஊற்றிக் குக்கரில் வேகவைத்து நன்கு மசிக்கவும். மிச்சப் பாலையும் சர்க்கரையையும் சேர்த்துக் கொதிக்க விடவும். இதில் ஏலப்பொடி தூவி முந்திரி கிஸ்மிஸை சேர்க்கவும். 

இன்ஸ்டண்ட் பாயாசம்

இன்ஸ்டண்ட் பாயாசம்

தேவையானவை:- பாசுமதி அரிசி சாதம் அல்லது பச்சரிசி சாதம் = ஒரு கைப்பிடி, மில்க் மெய்ட் – அரை டின், பால் ஒரு கப், ஏலப்பொடி – 1 சிட்டிகை. குச்சியாக அரிந்த பாதாம் பிஸ்தா முந்திரி – ஒரு டேபிள் ஸ்பூன்.

செய்முறை;- சாதத்தை மிக்ஸியில் பால் விட்டு அரைத்து வழிக்கவும். அதை லேசாக சூடுபடுத்தி மில்க் மெயிடைச் சேர்க்கவும். திக்னெஸ் அதிகமாக இருந்தால் இன்னும் சிறிது பால் சேர்க்கவும். ஏலப்பொடி முந்திரி பாதாம் பிஸ்தாவைக் கலந்து சூடாகவோ குளிரவைத்தோ பரிமாறவும்.

கேழ்வரகுப் பாயாசம்

கேழ்வரகுப் பாயாசம்

தேவையானவை :- கேழ்வரகு – அரை கப், பால் – ரெண்டு கப், சர்க்கரை – கால் கப், நெய் – ரெண்டு டீஸ்பூன், ஏலப்பொடி – 1 சிட்டிகை, முந்திரி கிஸ்மிஸ் – தலா 6.

செய்முறை:- கேழ்வரகைக் களைந்து காயவைத்து மிக்ஸியில் பொடித்துச் சலிக்கவும். இந்த மாவில் ஒரு கப் தண்ணீர் ஊற்றி கட்டியில்லாமல் கரைத்துக் குக்கரில் ஒரு விசில் வைக்கவும். இறக்கி அதில் பாலைச் சேர்த்துக் கரைத்து நன்கு கொதிக்க விடவும். கொதித்துக் கண்ணாடிபோல் ஒட்டாமல் இருக்கும்போது சர்க்கரை சேர்க்கவும். நெய்யில் முந்திரி கிஸ்மிஸைப் பொடித்துப் போட்டு ஏலப்பொடி தூவி இறக்கவும்.

 

மிக்ஸட் தால் பாயாசம்

மிக்ஸட் தால் பாயாசம்

தேவையானவை :-  பாசிப்பருப்பு  – ஒரு கைப்பிடி, கடலைப் பருப்பு – ஒரு கைப்பிடி, பச்சரிசி – ஒரு கைப்பிடி, மூன்றையும் வெறும் வாணலியில் வாசம் வரும்வரை வறுத்துக் கொரகொரப்பாகப் பொடிக்கவும். வெல்லம் – 2 அச்சு, நெய்- 2 டீஸ்பூன், தேங்காய் –  கால் கப் ,கொரகொரப்பாக அரைக்கவும், முந்திரி கிஸ்மிஸ் – தலா 10, ஏலக்காய் – 2  பொடிக்கவும்.

செய்முறை :- பச்சரிசி, பாசிப்பருப்பு, கடலைப்பருப்பு மாவை எடுத்து அளந்து 6 பங்கு தண்ணீர் சேர்த்துக் கரைத்துக் கொதிக்க விடவும் . வெந்ததும் வெல்லத்தைப் பொடித்துப் போட்டு வெந்நீரில் கரைத்து வடிகட்டிச் சேர்க்கவும். வெல்லமும் சேர்ந்து கொதித்ததும் அரைத்த தேங்காய் போட்டுக் கொதிக்க விடாமல் இறக்கவும். இதில் நெய்யில் வறுத்த முந்திரி கிஸ்மிஸ் போட்டு ஏலப்பொடி சேர்த்து இறக்கவும்

நுங்குப் பாயாசம்

நுங்குப் பாயாசம்

தேவையானவை :- இளநுங்கு – 5, பால் – அரை லிட்டர், சர்க்கரை – ஒரு டேபிள் ஸ்பூன். அரிசி மாவு – 1 டீஸ்பூன், ஏலப்பொடி – 1 சிட்டிகை.

செய்முறை:- பாலைக்காய்ச்சி அதில் சிறிது எடுத்து அரிசி மாவு சேர்த்துக் கரைத்துத் திரும்பப் பாலில் ஊற்றிக் கொதிக்க விடவும். இரண்டு நிமிடங்களுக்குப் பிறகு அதில் சர்க்கரையைச் சேர்த்துக் கரைந்ததும் இறக்கி வைத்து ஆறவிடவும். நன்கு ஆறியதும் ஏலப்பொடி போடவும். இளநுங்கை நீருடன் கையால் மசித்தோ அல்லது மிக்ஸியில் விப்பர் செய்தோ பாலுடன் நன்கு கலக்கி உபயோகப்படுத்தவும்.

 

மேக்கரோனி பாயாசம்

மேக்கரோனி பாயாசம்

தேவையானவை :- மேக்கரோனி - 1 கப், பால் - 2 லிட்டர், மில்க் மெய்ட்  - 1 டேபிள் ஸ்பூன், சீனி - 1/2 கப், குங்குமப்பூ - 1 சிட்டிகை, ஏலப்பொடி - 1 சிட்டிகை, முந்திரி – 10, நெய் - 10 கி

செய்முறை :- மேக்ரோனியைக் கழுவி 15 நிமிடம் தண்ணீரில் ஊறப்போடவும். பாலைக் காய்ச்சிக் கொதி வரும்போது மேக் ரோனியைச் சேர்த்து மென்மையாக வெந்ததும் சீனியைச் சேர்க்கவும். சீனி கரைத்து கொதித்ததும் இறக்கி மில்க் மெயிட் , ஏலப்பொடி , குங்குமப்பூ, நெய்யில் வறுத்த முந்திரி சேர்த்துப் பரிமாறவும்

கவுனரிசிப் பாயாசம்

கவுனரிசிப் பாயாசம்

தேவையானவை :- கவுனரிசி – 1 கப், தேங்காய் – 1 மூடி, சர்க்கரை – அரை கப், நெய் – 2 டீஸ்பூன், முந்திரி கிஸ்மிஸ் – தலா 10, ஏலப்பொடி – 1 சிட்டிகை.

செய்முறை:- கவுனரிசியைக் களைந்து இரண்டு மணி நேரம் ஊறவைக்கவும். இரண்டு கப் தண்ணீர் ஊற்றி குக்கரில் சோறு போல வேகவைத்து இறக்கி நன்கு மசித்து சர்க்கரை சேர்த்துக் கரைந்ததும் இறக்கவும். தேங்காயை சிறிது தண்ணீர் விட்டு அரைத்து கவுனரிசியில் சேர்க்கவும். ஏலப்பொடி தூவி நெய்யில் முந்திரி கிஸ்மிஸை வறுத்துப் போடவும்.

சக்கைப் பிரதமன்

சக்கைப் பிரதமன்

தேவையானவை:- பலாச்சுளை – 20, பாசிப்பருப்பு – 50 கி, தேங்காய் – 1, வெல்லம் – 4 அச்சு, ஏலக்காய் – 2, நெய் – 1 டேபிள் ஸ்பூன், முந்திரிப்பருப்பு – 15, பல்லு பல்லாக நறுக்கிய தேங்காய் – 2 டேபிள் ஸ்பூன்.

செய்முறை:- பாசிப்பருப்பை வேகப்போடவும். பலாச்சுளையை கொட்டை நீக்கி நறுக்கிக் குக்கரில் வேகவைத்து ஆறவைத்து மசிக்கவும். தேங்காயில் இரண்டு பால் எடுக்கவும். இரண்டாம் பாலைப் பருப்பில் ஊற்றி வெல்லத்தைக் கரைய வைக்கவும். அதில் அரைத்த பலாச்சுளையைப் போட்டுக் கொதித்ததும் இறக்கி நெய்யில் முந்திரி தேங்காய்ப்பல்லைப் பொறித்துப் போட்டு ஏலக்காய்ப் பொடி தூவிப் பரிமாறவும்.

நேந்திரம் பழப் பிரதமன்

நேந்திரம் பழப் பிரதமன்

தேவையானவை:- நேந்திரம் பழம் – 1, தேங்காய் முற்றியது – 1, வெல்லம் – 4 அச்சு, ஏலக்காய் – 2, நெய் – 2 டீஸ்பூன், முந்திரிப் பருப்பு – 15.

செய்முறை:- நேந்திரம்பழத்தைத் தோலுரித்து வேகவைத்து மசிக்கவும். தேங்காயைத் திருகி  கெட்டிப்பால் அரை கப்பும் தண்ணிப்பால் 1 ½ கப்பும் எடுக்கவும். வெல்லத்தைப் பொடித்துப் பாகு காய்ச்சி பழக்கூழையும் சேர்த்துக் காய்ச்சவும். நன்கு கிளறி இரண்டாம் பாலை ஊற்றி இறக்கி வைத்து முதல் பாலையும் சேர்க்கவும். நெய்யில் முந்திரியைப் பொறித்துப் போடவும்.

பாலாடைப் பிரதமன்

பாலாடைப் பிரதமன்

தேவையானவை:- ரெடிமேட் அடை – ஒரு பாக்கெட், பால் – 1 லி, மில்க் மெய்ட் – 200 கி, சீனி – 1 டேபிள்ஸ்பூன், ஏலக்காய்த் தூள் – 1 சிட்டிகை, குங்குமப்பூ – 1 சிட்டிகை, நெய் – 1 டேபிள் ஸ்பூன், முந்திரி – 15, காய்ந்த திராக்ஷை- 15.

செய்முறை:- அடையை முதலில் கொதிக்கும் நீரில் போட்டுக் கழுவிப் பின்பு வேகவைக்கவும். பாலைக் காய்ச்சி அதில் அடையைச் சேர்த்து வற்றவிடவும். சுண்டி வரும்போது மில்க மெயிடையும் சீனியையும் சேர்க்கவும். இறக்கி ஏலப்பொடி, குங்குமப்பூ ( சூடான பாலில் கரைத்து ஊற்றவும். ) போட்டு நெய்யில் முந்திரி திராக்ஷையை வறுத்துப் போடவும்.

குறுவை அரிசிப் பாயாசம்

குறுவை அரிசிப்  பாயாசம்

தேவையானவை:-  குறுவை அரிசி - அரை ஆழாக்கு, பால் - 1 லிட்டர், ஜீனி - 1/2 ஆழாக்கு, ஏலக்காய் – 2, முந்திரி  - 10, கிஸ்மிஸ் – 10, நெய் - 2 டீஸ்பூன்

செய்முறை:- குறுவை அரிசியை மிக்ஸியில் ஒன்றிரண்டாகப் பொடித்துக்  குக்கரில் அரை லிட்டர் பாலில் வேகவிடவும். வெந்ததும் இறக்கி மிச்ச பாலையும் சேர்த்து ஜீனி கரையும் வரை காய்ச்சி நெய்யில் முந்திரி கிஸ்மிஸ் பொறித்துப் போட்டு ஏலத்தைப் பொடி செய்து போட்டுப் பரிமாறவும்.

30 வகைப் பாயாசம்

30 வகைப் பாயாசம்

குழாய்ப் புட்டு

குழாய்ப் புட்டு

தேவையானவை :-, பச்சரிசி – 2 கப், தேங்காய் – 1, உப்பு – 1 சிட்டிகை., குழாய்ப் புட்டு செய்ய குழாய்ப் புட்டுக்குழல் பாத்திரமும் மாவு சலிக்க சல்லடையும் வேண்டும்.

 

செய்முறை :- பச்சரிசியக் களைந்து ஒரு மணி நேரம் ஊறவிடவும். ஊறியதும் நீரை வடித்துவிட்டு மிக்ஸியில் அரைத்து நைஸ் சல்லடையில் சலிக்கவும். மாவில் உப்புக் கலந்து பிசறி வைக்கவும்.

தேங்காயை உடைத்துத் தோல் வராமல் மென்மையாகத் துருவவும். குழாய்ப் புட்டுப் பாத்திரத்தை அடுப்பில் வைத்து நீர் ஊற்றவும். அதன் குழல் போன்ற பகுதியில் அச்சைப் போட்டு முதலில் கொஞ்சம் மாவு பின் தேங்காய்த் துருவல் போடவும். இதே போல் மூன்று லேயர் போட்டு பாத்திரத்தில் ஃபிட் செய்து அடுப்பில் வைத்து வேகவுடவும். பத்து நிமிடங்களில் வெந்ததும் இறக்கி ஏலப் பொடியுடன் சீனி சேர்த்துப் பரிமாறவும்.

கொழுக்கட்டை

கொழுக்கட்டை

தேவையானவை :- இட்லி அரிசி - 2 கப், துருவிய தேங்காய் - 1 கப், பொடியாக அரிந்த வெங்காயம் - 1/2 கப், வரமிளகாய் - 4 விதை நீக்கி சின்னதாக வெட்டவும்., கருவேப்பிலை - 1 இணுக்கு, உப்பு - 1 டீஸ்பூன், உளுந்து - 1 டீஸ்பூன், ஜீரகம் - 1/2 டீஸ்பூன்., எண்ணெய் - 3 டீஸ்பூன்.

செய்முறை :- இட்லி அரிசியைக் கழுவி 2 மணி நேரம் ஊறவைக்கவும். கொரகொரப்பாக அரைக்கவும். பானில் எண்ணெயைக் காயவைத்து உளுந்து., சீரகம்., வரமிளகாய்., கருவேப்பிலை போடவும். வெங்காயம் போட்டு நன்கு வதக்கி மாவை ஊற்றவும். உப்பு சேர்க்கவும். 5 நிமிடம் நன்கு கிளறி கையில் ஒட்டாமல் வரும்போது தேங்காய்த்துருவல் சேர்க்கவும். அடுப்பை அணைத்து மாவை கையால் நன்கு பிசைந்து எலுமிச்சை உருண்டைகளாகவும் பிடி கொழுக்கட்டைகளாகவும் பிடித்து ஆவியில் 20 நிமிடம் வேகவிடவும்.

சர்க்கரை வள்ளிக்கிழங்கு புட்டுப் பொடிமாஸ்

சர்க்கரை வள்ளிக்கிழங்கு புட்டுப் பொடிமாஸ்

தேவையானவை :- சர்க்கரை வள்ளிக்கிழங்கு -  4, சின்ன வெங்காயம் - 6, பச்சை மிளகாய் - 1, உப்பு - கால் டீஸ்பூன்,  தாளிக்க - எண்ணெய் - 2 டீஸ்பூன். கடுகு - அரை டீஸ்பூன், உளுந்து - ஒரு டீஸ்பூன், கருவேப்பிலை - 1 இணுக்கு.

செய்முறை :- சர்க்கரை வள்ளிக்கிழங்குகளை வேகவைத்துத் தோலுரிக்கவும். புட்டுபோல உதிர்த்துக் கொள்ளவும். சின்ன வெங்காயம் பச்சை மிளகாயைப் பொடிப்பொடியாக நறுக்கவும். கடாயில் எண்ணெயைக் காயவைத்துக் கடுகு போட்டு வெடித்ததும் உளுந்து போட்டுச் சிவந்ததும் பச்சைமிளகாய், வெங்காயம் கருவேப்பிலையைத் தாளிக்கவும். ஓரிரு நிமிடங்கள் வதக்கியபின் உதிர்த்த சர்க்கரைவள்ளிக்கிழங்கையும் உப்பையும் சேர்க்கவும்.  நன்கு கலக்கி கிளறி இறக்கவும்.