புழுங்கொடியல் லட்டு

புழுங்கொடியல் லட்டு

தேவையானவை:- புழுங்கொடியல் மாவு – 2 கப் ( பனங்கிழங்கை புழுங்க வேகவைத்துத் துண்டு துண்டாக ஆக்கிக் காயவைத்து இடித்துச் சலித்துப் பெறப்படும் மாவு இது ). பனை வெல்லம் – 150 கி, ஏலக்காய் – 6, முந்திரி, கிஸ்மிஸ் – தலா 10, தேங்காய்த்துருவல் – 1 கப், மில்க்மெய்ட் – 2 டேபிள் ஸ்பூன். நெய் – 1 டேபிள் ஸ்பூன்

செய்முறை:- ஒரு டீஸ்பூன் நெய்யில் முந்திரி, கிஸ்மிஸை வறுத்து எடுக்கவும். இன்னொரு டீஸ்பூன் நெய்யில் தேங்காய்த்துருவலை வறுத்து இறக்கவும். மிச்ச நெய்யை ஊற்றி புழுக்கொடியல் மாவை மெல்லிய தீயில் நன்கு வறுக்கவும். பனை வெல்லத்தைத் தூளாக்கி இதில் போட்டுக் கிளறவும். தேங்காய்த் துருவலைப் போட்டு நன்கு கிளறி மில்க்மெய்டைப் போட்டுக் கலக்கவும். ஏலக்காயைப் பொடித்துப் போட்டு சூட்டுடன் உருண்டைகள் பிடிக்கவும்.

ஒடியல் கூழ்

ஒடியல் கூழ்

தேவையானவை:- பனங்கிழங்கு மாவு – இரண்டு கப், அரிசி, உளுந்து தலா – 1 டேபிள் ஸ்பூன், தட்டைப் பயித்தங்காய் – 6, பலாக் கொட்டை – 10, பூசணிக்காய் – ஆறு துண்டு, மரவள்ளிக்கிழங்கு – 1, முருங்கை இலை – ஒரு கைப்பிடி, உப்பு – 2 டீஸ்பூன், புளி – ஒரு நெல்லி அளவு, மஞ்சள் தூள் – 1 சிட்டிகை, மிளகு, சீரகம் – தலா ஒரு டீஸ்பூன், வரமிளகாய் – 4, சின்ன வெங்காயம் – 4.

செய்முறை:- ஒடியல் மாவை நீரூற்றிக் கலந்து ஊறவைக்கவும். தட்டைப் பயித்தங்காய், பலாக்கொட்டை, பூசணிக்காய் மரவள்ளிக்கிழங்கை சிறு துண்டுகளாக்கவும். அரிசி உளுந்தைக் கழுவி நான்கு கப் நீரூற்றி வேகவிடவும். பாதி வெந்ததும் காய்களைச் சேர்க்கவும். காய்களும் வெந்ததும் உப்புப் புளிக் கரைத்து ஊற்றவும். மிளகு, சீரகம், வரமிளகாய், சின்ன வெங்காயத்தை அரைத்துச் சேர்க்கவும். ஒடியல் மாவின் நீரை வடித்துவிட்டுச் சேர்த்து முருங்கைக் கீரையையும் போட்டுப் பத்து நிமிடம் வெந்ததும் இறக்கவும்.

பனங்கிழங்குக் காரப் புட்டு

பனங்கிழங்குக் காரப் புட்டு

தேவையானவை:- பனங்கிழங்கு – 8, மஞ்சள்தூள் – 1 சிட்டிகை, உப்பு – 2டீஸ்பூன், பூண்டு – 4 பல், பச்சைமிளகாய் – 2, கருவேப்பிலை – இணுக்கு, சீரகம் – அரை டீஸ்பூன், தேங்காய்த்துருவல் – 2 டீஸ்பூன்

செய்முறை:- பனங்கிழங்கின் மேல் தோலுரித்து உப்பு மஞ்சள் தூள் போட்டு இரண்டு கப் நீரூற்றிக் குக்கரில் 8 விசில் வரும்வரை வேகவிடவும். நன்கு ஆறியதும் நடு நரம்பை எடுத்துத் தோலுரித்துத் துண்டுகளாக்கி வெய்யிலில் சிறிது நேரம் காயப்போடவும். மிக்ஸியில் பச்சைமிளகாய், பூண்டு, சீரகம், உப்பு, கருவேப்பிலையை பெரபெரவென அரைக்கவும். அதிலேயே காய்ந்த பனங்கிழங்கைப் போட்டு அரை நிமிடம் ஓட்டி எடுத்துத் தேங்காய்த்துருவல் கலந்து பரிமாறவும்.

கருப்பட்டிப் பணியாரம்

கருப்பட்டிப் பணியாரம்

தேவையானவை:- பச்சரிசி -2 கப், வெல்லம் + கருப்பட்டி - 200 கி, எண்ணெய் - பொரிக்கத் தேவையான அளவு.

செய்முறை:- பச்சரிசியைக் கழுவி இரண்டு மணி நேரம்  ஊறவைத்து வடிகட்டி நிழலில் போடவும். பத்து நிமிடம் கழித்து மிக்ஸியில் அரைத்துச் சலிக்கவும். ஒரு கட்டி வெல்லத்தோடு கருப்பட்டியையு நைத்துப் போட்டு அரைக் கப் தண்ணீர் ஊற்றிக் கரைய விடவும். வெல்லமும் கருப்பட்டியும் கரைந்ததும் மாவில் வடிகட்டி ஊற்றி கரண்டிக் காம்பால் கிளறி நன்கு பிசைந்து உருட்டி வைக்கவும். மறுநாள் எண்ணெயைக் காயவைத்து மாவைக் கரைத்துப் பணியாரங்களாக ஊற்றவும். எண்ணையோடு சிறிது நெய்யையும் சேர்த்துக் காய்ச்சி ஊற்றலாம். மிகவும் ருசியாக  இருக்கும்.

கருப்பட்டி மோதகம்

கருப்பட்டி மோதகம்

தேவையானவை:- பச்சரிசி – 2 கப், கடலைப்பருப்பு, பாசிப்பருப்பு தலா கால் கப், கருப்பட்டி – கால் கிலோ, வெல்லம் – 50 கி. ஏலக்காய் – 2, நெய் – 1 டேபிள் ஸ்பூன், தேங்காய்த்துருவல் – 2 டேபிள் ஸ்பூன். உப்பு – 1 சிட்டிகை.

செய்முறை:- பச்சரிசி கடலைப்பருப்பு, பாசிப்பருப்பை வெதுப்பி கரகரப்பாகப் பொடிக்கவும். மூன்றரை கப் தண்ணீரைக் கொதிக்கவைத்துக் கருப்பட்டியையும் வெல்லத்தையும் நைத்துப் போடவும். அது கரைந்ததும் பாதி நெய்யை ஊற்றி இந்த மாவைக் கொட்டிக் கிளறி உப்பு சேர்த்து மூடி வைக்கவும். கட்டி தட்டாமல் கிளறி மாவு உருண்டு வெந்ததும் இறக்கி நெய்யில் முந்திரியைப் பொரித்துப் பொட்டு தேங்காய்த்துருவலை வதக்கி இதில் கொட்டி நன்கு பிசைந்து உருண்டைகள் செய்து ஆவியில் 20 நிமிடம் வேகவைக்கவும்.