எனது 24 நூல்கள்

எனது 24 நூல்கள்
எனது இருபத்து நான்கு நூல்கள்

செவ்வாய், 28 டிசம்பர், 2021

கொத்துமல்லி தேங்காய் சம்மந்தி

கொத்துமல்லி தேங்காய் சம்மந்தி:-



தேவையானவை :- மல்லி - 1 கட்டு, பச்சை மிளகாய் - 4, தேங்காய் - கால் மூடி, சின்ன வெங்காயம் - 2, பூண்டு - 1 பல், புளி - 1 சுளை, உப்பு - கால் தேக்கரண்டி, பெருங்காயம் - 1 துண்டு.

செய்முறை:- மல்லியை சுத்தம் செய்து நன்கு அலசி பொடியாக நறுக்கவும் ( இல்லாவிட்டால் மிக்ஸியில் மாட்டிக் கொள்ளும் ) . வெங்காயம் பூண்டை உரித்து இரண்டாக நறுக்கவும்.  பச்சை மிளகாய் வெங்காயம் வெள்ளைப்பூண்டு, உப்பு, புளி பெருங்காயத்தை மிக்சியில் சிறிது அரைத்துக் கொண்டு அதன் பின் தேங்காயைச் சேர்த்து அரைத்து அதன் பின் மல்லியை மிக்சி கொள்ளும் வரை சிறிது சிறிதாகச் சேர்த்து நன்கு மைய அரைத்தெடுக்கவும். சூடான இட்லி அல்லது தோசையுடன் பரிமாறவும். சாதத்தில் நெய் விட்டு இத்துவையலைப் போட்டுப் பிசைந்தும் சாப்பிடலாம். தயிர் சாதத்துக்குத் தொட்டுக்கொள்ளவும் அருமையாக இருக்கும். 
 

புதன், 22 டிசம்பர், 2021

காரட் தக்காளி சூப்

காரட் தக்காளி சூப்


தேவையானவை:- காரட் - 1, தக்காளி - 2, பெரிய வெங்காயம் - 1, உப்பு - அரை டீஸ்பூன், மிளகுத்தூள் - 1/4 டீஸ்பூன், வெண்ணெய்  அல்லது க்ரீம் - ஒரு டீஸ்பூன் விரும்பினால்

செய்முறை:- காரட், வெங்காயத்தைத் தோலுரித்துத் துண்டுகள் செய்து தக்காளியுடன் குக்கரில் இரண்டு கப் நீரூற்றி வேகப்போடவும். இரண்டு விசில் வந்ததும் இறக்கி ஆறியதும் நீரில்லாமல் எடுத்து மிக்ஸியில் போட்டு மசிக்கவும். திரும்ப அதே நீரில் அரைத்ததை வழித்து ஊற்றிக் கொதிக்க விடவும். கொதித்ததும் இறக்கி உப்பு, மிளகுத்தூள்,  வெண்ணெய் சேர்த்துக் கலந்து அருந்தக் கொடுக்கவும். 


 

சோளா பூரி

சோளா பூரி :-



தேவையானவை:- மைதா மாவு - அரை கப், வெள்ளை ரவை - அரை கப், ஆட்டா ( கோதுமை மாவு) - அரை கப், உப்பு - 1/2 டீஸ்பூன். எண்ணெய் - பொரிக்கத் தேவையான அளவு

செய்முறை:- ரவை, மைதா, கோதுமை மாவுகளை ஒரு பௌலில் போட்டு உப்பு சேர்த்து ஒரு கப் நீர் விட்டு மென்மையாகப் பிசையவும். பெரிய எலுமிச்சை அளவு உருண்டைகள் எடுத்து பூரிகளாகத் தேய்த்து எண்ணெயைக் காயவைத்துப் பொரித்தெடுக்கவும். சன்னா மசால் ( கறுப்பு அல்லது வெள்ளைக் கொண்டைக்கடலை மசாலாவுடன் )  , வெங்காயத்துடன் பரிமாறவும். 
 

ஞாயிறு, 19 டிசம்பர், 2021

பரங்கிக்காய் புளிக்கறி

பரங்கிக்காய் புளிக்கறி:---


தேவையானவை :-
பரங்கிக்காய் – 1 கீத்து, சின்ன வெங்காயம் – 8, வெள்ளைப் பூண்டு – 4, வரமிளகாய் – 4, சாம்பார் பொடி – 1 டீஸ்பூன், புளி – எலுமிச்சை அளவு, உப்பு – அரை டீஸ்பூன், எண்ணெய் – 1டேபிள் ஸ்பூன், கடுகு – அரை டீஸ்பூன், உளுந்து -  1 டீஸ்பூன், சோம்பு – கால் டீஸ்பூன், கருவேப்பிலை – 1 இணுக்கு, வெல்லம் – சிறு துண்டு.

செய்முறை:- பரங்கிக்காயை விதை நீக்கி பெரிய துண்டுகளாக நறுக்கிக் கொள்ளவும். சின்ன வெங்காயம் வெள்ளைப்பூண்டை உரித்து இரண்டாக வெட்டிக் கொள்ளவும். புளியை உப்புப் போட்டு அரைகப் தண்ணீரில் ஊறவைக்கவும்.

கடாயில் எண்ணெயைக் காயவைத்துக் கடுகு போட்டு வெடித்ததும் உளுந்து போட்டுச் சிவந்ததும் வரமிளகாயைக் கிள்ளிப் போட்டு சோம்பு கருவேப்பிலை தாளித்து வெங்காயம் வெள்ளைப் பூண்டைப் போட்டு வதக்கவும். ஒரு நிமிடம் வதங்கியதும் பரங்கிக்காயைக் கழுவிச் சேர்க்கவும். இரண்டு நிமிடங்கள் வதக்கி சாம்பார் பொடி போட்டு புளியைக் கெட்டியாகக் கரைத்து ஊற்றவும். நன்கு கிளறி விட்டுக் கொதி வந்ததும் அடக்கி வைத்து மூடி போட்டு 10 நிமிடம் சிம்மில் வேக விடவும். வெந்ததும் இறக்குமுன் வெல்லம் போட்டு நன்கு கிளறி இறக்கவும்.

 

புதன், 15 டிசம்பர், 2021

தினை பாசிப்பருப்புப் பாயாசம்

தினை பாசிப்பருப்புப் பாயாசம்.


தேவையானவை :- பாசிப்பருப்பு – 1 கப், தினை - 1 டேபிள் ஸ்பூன், தேங்காய்த் துருவல் – 1 டேபிள் ஸ்பூன், பால் 2 கப். சர்க்கரை – கால் கப், ஏலப்பொடி – 1 சிட்டிகை, நெய் – 2 டீஸ்பூன், முந்திரி கிஸ்மிஸ் – தலா 10.

செய்முறை :- பாசிப்பருப்பைக் குக்கரில்  பதமாக வேகவைத்து இறக்கவும்.தினையைக் குழைய வேகவைத்து இறக்கவும். இரண்டையும் மசித்து இரண்டு கப் பால் ஊற்றிக் கொதிக்க விடவும். நன்கு கொதிக்கும்போது சீனி சேர்த்து கரைந்ததும் இறக்கவும். ஒரு வாணலியில் நெய்யைக் காயவைத்து முந்திரி கிஸ்மிஸைப் பொரித்தெடுக்கவும்.  இதில் ஏலப்பொடி, முந்திரி கிஸ்மிஸ் தேங்காய்த் துருவல் கலந்து நிவேதிக்கவும். 

 

ஞாயிறு, 12 டிசம்பர், 2021

கம்பு கேப்பை பூரி

கம்பு கேப்பை பூரி


தேவையானவை:- கம்பு மாவு - அரை கப், கேப்பை  மாவு ( ராகி ) - அரை கப், ஆட்டா ( கோதுமை மாவு) - அரை கப், உப்பு - 1/2 டீஸ்பூன். எண்ணெய் - பொரிக்கத் தேவையான அளவு

செய்முறை:- கம்பு , கேப்பை, ஆட்டா மாவுகளை ஒரு பௌலில் போட்டு உப்பு சேர்த்து ஒரு கப் நீர் விட்டு மென்மையாகப் பிசையவும். எலுமிச்சை அளவு உருண்டைகள் எடுத்து பூரிகளாகத் தேய்த்து எண்ணெயைக் காயவைத்துப் பொரித்தெடுக்கவும். உருளை மசால், தக்காளித் திறக்கலுடன் பரிமாறவும். 

வியாழன், 9 டிசம்பர், 2021

20.ரோஜாப்பூ வனிலா பாயாசம்

20.ரோஜாப்பூ வனிலா பாயாசம்

 


தேவையானவை:- ரோஜாப்பூ – 4, பால் – ஒரு லிட்டர், கார்ன் ஃப்ளோர் – 2 டேபிள் ஸ்பூன், சீனி – 2 டேபிள் ஸ்பூன், வனிலா எஸன்ஸ் – சில துளிகள், ரோஸ் கலர் –சில துளிகள். பாதாம், முந்திரி, பிஸ்தா – தலா 4 நெய்யில் வறுத்துப் பெரிய துண்டுகளாகப் பொடிக்கவும்.

 

செய்முறை:- ரோஜாப்பூவை உதிர்த்து வைக்கவும். பாலை நன்கு காய்ச்சி சிறிது எடுத்து ஆறவிடவும். மீதிப்பாலில் கார்ன்ஃப்ளோரையும் சீனியையும் போட்டுப் பாதியாகும் அளவு காய்ச்சி ஆறவைக்கவும். முன்பு எடுத்த வைத்த பால் ஆறியதும் ரோஜா இதழ்களைப் போட்டு மிக்ஸியில் நைஸாக அரைக்கவும். இதை கார்ன்ஃப்ளோர் சீனி போட்டுக் காய்ச்சிய பாலில் ஊற்றி வனிலா எஸன்ஸ், ரோஸ் கலர் சேர்த்துக் குளிர்சாதனப் பெட்டியில் வைத்துக் குளிர்விக்கவும். வறுத்த பாதாம் பிஸ்தா முந்திரித் துண்டுகளைப் பரிமாறும்போது கண்ணாடிக் குவளைகளில் ஊற்றி மேலாகத் தூவிக் கொடுக்கவும். 

 

 

ஞாயிறு, 5 டிசம்பர், 2021

19.கோபி பரோட்டா

19.கோபி பரோட்டா

 


தேவையானவை:- கோதுமை மாவு - 2 கப்,உப்பு - 1/2 டீஸ்பூன், வெண்ணெய்/நெய் - 1 டேபிள் ஸ்பூன், தண்ணீர், எண்ணெய் போதுமான அளவு, காலிஃப்ளவர் – 6 பூ ( பொடியாக அரிந்தது), பெரிய வெங்காயம் - 1 டேபிள் ஸ்பூன் பொடியாக அரிந்தது., வரமிளகாய்த் தூள் - 1/3 டீஸ்பூன், கரம் மசாலா - 1/4 டீஸ்பூன்

 

செய்முறை:- கோதுமைமாவுடன் வெண்ணெய்/நெய் & உப்பைக் கலக்கவும் தேவையான தண்ணீர் ஊற்றி நன்கு மென்மையாக பிசையவும். ஒரு ஈரத்துணியில் மூடி ஊறவைக்கவும். பொடியாக அரிந்த காலிஃப்ளவருடன் பொடியாக அரிந்த வெங்காயம், மிளகாய்ப் பொடி, கரம் மசாலாப் பொடியை சேர்க்கவும். மாவை 12 சம உருண்டகளாக உருட்டி கிண்ணம் போல் செய்து அதில் ஒரு டீஸ்பூன் காலிஃப்ளவர் கலவையை வைத்து உருட்டவும். மாவில் புரட்டி கனமான பரோட்டாக்களாகச் செய்து எண்ணெய் அல்லது நெய்யில் சுட்டெடுத்து மூங்தால் சப்ஜி (பாசிப்பயறு) யுடன் பரிமாறவும்.

 

புதன், 1 டிசம்பர், 2021

18.ஆலு கோபி

18.ஆலு கோபி


 

தேவையானவை:- உருளைக்கிழங்கு – 2, காலிஃப்ளவர் - 1 சிறியது, எண்ணெய் - 3 டீஸ்பூன், சீரகம் - 1/2 டீஸ்பூன், சீரகப்பொடி - 1/2 டீஸ்பூன், மிளகாய்த்தூள் - 1 டீஸ்பூன், கரம் மசாலா தூள் + ஆம்சூர் பொடி - 1/2 டீஸ்பூன், உப்பு - 1/2 டீஸ்பூன்.

 

 

செய்முறை:- உருளையை தோலுரித்து கழுவி விரல் அளவு துண்டுகளாக்கவும். காலிஃப்ளவரை பூக்களாய்ப் பிரித்து உப்பு கலந்த வெந்நீரில் போட்டு 5 நிமிடம் வைக்கவும். தண்ணீரை வடித்து பூக்களை தனியாக வைக்கவும். பானில் எண்ணெயைக் காயவைத்து சீரகம் போடவும். பொறிந்ததும் உருளை , காலிஃப்ளவரைச் சேர்த்து 2 நிமிடம் வதக்கவும். சீரகப்பொடி., மிளகாய்ப்பொடி., கரம் மசாலா பொடி., ஆம்சூர் பொடி., உப்பு சேர்த்து நன்கு கிளறி மூடி போட்டு சிம்மில் 7 நிமிடம் வேகவைத்து சூடாக சப்பாத்தி., ரொட்டி., நான்., குல்ச்சாக்களுடன் பரிமாறவும்.

 

ஞாயிறு, 28 நவம்பர், 2021

17.காலிஃப்ளவர் சொதி

17.காலிஃப்ளவர் சொதி

 


தேவையானவை:- காலிஃப்ளவர் சின்னம் - 1, பெரிய வெங்காயம் - 1, தக்காளி - 1, தேங்காய் - அரை மூடி, பச்சை மிளகாய் - 6, வரமல்லி - 1 டீஸ்பூன், சோம்பு - அரை டீஸ்பூன், சீரகம் - கால் டீஸ்பூன், மிளகு - 6, பொட்டுக்கடலை - 2 டீஸ்பூன், பூண்டு - 4 பல், இஞ்சி - சிறு துண்டு, கசகசா - அரை டீஸ்பூன், தாளிக்க - எண்ணெய் - 1 டேபிள் ஸ்பூன், பட்டை, இலை, பூ, கிராம்பு, ஏலக்காய் - தலா ஒன்று.  கருவேப்பிலை - இணுக்கு , உப்பு - 1 டீஸ்பூன்.

 


செய்முறை:- காலிஃப்ளவரை சுத்தம் செய்து பூக்களாகப் பிரித்து உப்பு கலந்த வெந்நீரில் மூன்று நிமிடம் போட்டு வடிக்கவும். பெரிய வெங்காயம், தக்காளியைப் பொடியாக நறுக்கவும். அரை டீஸ்பூன் எண்ணெயில் கீறிய பச்சைமிளகாய், மல்லி, சோம்பு, சீரகம், மிளகு, கசகசா, தேங்காய் ஆகியவற்றை வெதுப்பவும். இத்துடன் பொட்டுக்கடலை, பூண்டு, இஞ்சி சேர்த்து அரைத்து வைக்கவும். கடாயில் எண்ணெயைக் காயவைத்துப் பட்டை இலை பூ, கிராம்பு, ஏலக்காய் போட்டு அதில் வெங்காயம் தக்காளியைப் போட்டு வதக்கவும். கருவேப்பிலை சேர்த்து அரைத்த மசாலாவையும் போட்டுத் திறக்கவும். இத்துடன் காலிஃப்ளவரைச் சேர்த்து 3 கப் தண்ணீர் ஊற்றி வேகவிடவும். பாதி வெந்ததும் உப்பு சேர்க்கவும். இன்னும் ஐந்து நிமிடங்கள் வெந்ததும் பொடியாக அரிந்த கொத்துமல்லி தூவி இறக்கவும்.

 

செவ்வாய், 23 நவம்பர், 2021

16.காலிஃப்ளவர் காரட் ஊறுகாய்

16.காலிஃப்ளவர் காரட் ஊறுகாய்

 


தேவையானவை:- காலிஃப்ளவர் – 1, காரட் – 2, எலுமிச்சைச் சாறு – அரை கப், இஞ்சி துருவியது – ஒரு டீஸ்பூன், வெல்லம் துருவியது – 2 டீஸ்பூன், மிளகாய்த்தூள் – 2 டீஸ்பூன், சீரகத்தூள் –அரை டீஸ்பூன், உப்பு – 2 டீஸ்பூன், எண்ணெய் – 2 டீஸ்பூன்.

 

செய்முறை:- காரட்டையும் காலிஃப்ளவரையும் நீளவாக்கில் நறுக்கி கொதிக்கும் வெந்நீரில் மூன்று நிமிடம் போட்டு வெந்நிப்படுத்தி வடிகட்டி வைக்கவும். இதை ஈரம் போகும்படி உலரவிடவும். எண்ணெயைக் காயவைத்து இஞ்சியைப் போடவும். அதில் மிளகாய்த்தூளையும் உப்பையும் போட்டுக் கலக்கி உடனே எலுமிச்சைச் சாறை ஊற்றவும்.  அது கொதிக்கும்போது காலிஃப்ளவர், காரட்டைப் போட்டுப் புரட்டவும். இரு நிமிடம் புரட்டியதும் சீரகத்தூளைப் போட்டு வெல்லத்தையும் துருவிப் போட்டு நன்கு கலக்கிவிட்டு அடுப்பை அணைக்கவும். இரு நாட்கள் கழித்து உபயோகிக்கவும். 

ஞாயிறு, 21 நவம்பர், 2021

15.வாழைப்பூ சாப்ஸ்

15.வாழைப்பூ சாப்ஸ்

 


தேவையானவை:- வாழைப்பூ – இரண்டுமடல்களை உரித்து 30 – 40 பூக்களை எடுத்துக் கொள்ளவும். இஞ்சி பூண்டு பேஸ்ட் – 1 டீஸ்பூன், கடலைமாவு – அரை கப், மைதாமாவு – 1 டேபிள் ஸ்பூன், சோளமாவு – 1 டேபிள் ஸ்பூன், மிளகாய்த்தூள் – அரை டீஸ்பூன், உப்பு – அரை டீஸ்பூன், தேங்காய்ப்பால் – அரை கப். எண்ணெய் – பொரிக்கத் தேவையான அளவு

 

செய்முறை:- வாழைப்பூவை நரம்பு எடுத்து வெந்நீரில் மூன்று நிமிடம் போட்டு உலர வைக்கவும். உலர்ந்ததும் இதில் இஞ்சி பூண்டு பேஸ்டைத் தடவிப் பிரட்டி வைக்கவும்.  கடலைமாவு, மைதாமாவு, சோளமாவுடன் உப்பு, மிளகாய்த்தூள், தேங்காய்ப்பால் சேர்த்துப் பஜ்ஜி மாவுப் பதத்தில் கரைக்கவும். தேங்காய்ப்பால் போதாவிட்டால் சிறிது நீர் சேர்த்துப் பிசையவும். எண்ணெயைக் காயவைத்து வாழைப்பூக்களை ஒவ்வொன்றாக எடுத்து மாவில் தோய்த்துப் போட்டுப் பொரித்தெடுக்கவும்.  
 

புதன், 17 நவம்பர், 2021

13.வாழைப்பூ பால் கூட்டு

13.வாழைப்பூ பால் கூட்டு

 


தேவையானவை:- வாழைப்பூ - பாதி ( உள்ளிருக்கும் தளிர் பகுதி), துவரம் பருப்பு /பாசிப்பருப்பு - 50 கி, பெரிய வெங்காயம் - 1 பொடியாக அரியவும்., பச்சை மிளகாய் - 1 இரண்டாக வகிரவும்., சாம்பார் பொடி - 1/4 டீஸ்பூன், கருவேப்பிலை - 1 இணுக்கு, எண்ணெய் - 1 டீஸ்பூன், கடுகு - 1 டீஸ்பூன், உளுந்து - 1 டீஸ்பூன், தேங்காய்ப் பால் அல்லது பால் - 1/4 கப்

 

செய்முறை:- வாழைப்பூவின் நரம்புகளை எடுத்துவிட்டுப் பொடியாக நறுக்கவும். துவரம் பருப்பு அல்லது பாசிப்பருப்பை வேக வைக்கவும். அதில் வாழைப்பூ, வெங்காயம், பச்சை மிளகாய், சாம்பார் பொடி போட்டு தேவையான தண்ணீர் ஊற்றி மென்மையாகும் வரை வேக வைக்கவும். உப்பு சேர்த்து இன்னும் இரு நிமிடங்கள் வேக விடவும். எண்ணெயில் கடுகு, உளுந்து, கருவேப்பிலை தாளித்துக் கொட்டவும். தேங்காய்ப் பால் அல்லது பாலைச் சேர்த்து சூடாக வத்தக்குழம்பு சாதத்தோடு பரிமாறவும்.

 

ஞாயிறு, 14 நவம்பர், 2021

12.ப்ராகோலி சூப்

12.ப்ராகோலி சூப்

 


தேவையானவை:- ப்ராகோலி  – ½ பாகம், பெரிய வெங்காயம் – 1, தக்காளி – 2, உப்பு – ½ டீஸ்பூன், மிளகுத்தூள் – ¼ டீஸ்பூன், வெண்ணெய்/க்ரீம் – 1 டீஸ்பூன் விரும்பினால்

 

செய்முறை:- ப்ராகோலியைத் துண்டுகளாக்கிப் பெரியவெங்காயம் தக்காளியையும் துண்டுகளாக்கி குக்கரில் மூழ்கும் அளவு தண்ணீர் சேர்த்து ஒரு விசில் வேக விடவும். ஆறியதும் திறந்து மிக்ஸியில் அரைத்து வடிகட்டவும். இதை சூடுபடுத்தி உப்பு சேர்த்து மிளகு தூவி விரும்பினால் க்ரீம் அல்லது வெண்ணெய் சேர்த்துப் பரிமாறவும்.

 

புதன், 10 நவம்பர், 2021

11.ப்ராகோலி புலவ்

11.ப்ராகோலி புலவ்

 


தேவையானவ:- பாசுமதி அரிசி – 2 கப், ப்ராகோலி – 1, பட்டர் பீன்ஸ் – ஒரு கைப்பிடி, பெரிய வெங்காயம் – 2, தக்காளி – 2,பச்சை மிளகாய் – 2, இஞ்சி பூண்டு பேஸ்ட் – 1 டேபிள் ஸ்பூன், தயிர் – அரை கப், உப்பு – 1 டீஸ்பூன், கொத்துமல்லித் தழை – 1 டேபிள் ஸ்பூன், புதினா – 20 இலை., நெய் – 30 கி, அரைக்க:- முந்திரி – 4, கசகசா – 1 டீஸ்பூன், தேங்காய் – 1 டேபிள் ஸ்பூன், தாளிக்க :- பட்டை கிராம்பு ஏலக்காய் – தலா 2, சோம்பு – 4 டீஸ்பூன்.

 


செய்முறை:- பாசுமதி அரிசியைக் களைந்து  சிறிது நெய்யில் வறுத்து வைக்கவும். வெங்காயத்தை நீளமாக நறுக்கவும். தக்காளி, ப்ராகோலியைத் துண்டுகளாக்கவும். அரைக்கக் கொடுத்துள்ளவற்றை அரைத்து மூன்றரை கப் தண்ணீர் ஊற்றி வடிகட்டி எடுத்துக் கொள்ளவும். குக்கரில் எண்ணெயைக் காயவைத்து சோம்பு பட்டை கிராம்பு ஏலக்காயைப் போடவும். பொரிந்ததும் வெங்காயத்தை வதக்கி இஞ்சி பூண்டு பேஸ்ட் போடவும். லேசாக சிவந்ததும் ப்ராகோலி, பட்டர் பீன்ஸைப் போடவும். கிளறிவிட்டு பச்சை மிளகாய் தக்காளியைச் சேர்த்து நன்கு வதக்கவும். தயிர் சேர்த்து மூடி 5 நிமிடம் சிம்மில் வேகவிடவும். இதில் அரிசியையும் அரைத்து வடிகட்டிய தேங்காய் முந்திரித் தண்ணீரையும் சேர்க்கவும். உப்பு போட்டு நன்கு கிளறி குக்கரை மூடி ஒரு விசில் வந்ததும் இறக்கவும். ( அதிகம் வெந்தால் ப்ராகோலி குழைந்துவிடும் ) புதினா கொத்துமல்லியைத் தூவிப் பரிமாறவும்.

ஞாயிறு, 7 நவம்பர், 2021

10.வேப்பம்பூ எலுமிச்சை ரசம்

10.வேப்பம்பூ எலுமிச்சை ரசம்

 


தேவையானவை :- வேப்பம்பூ – 1 கைப்பிடி, எலுமிச்சை – 1., நெய் – 1 டீஸ்பூன், மிளகு சீரகத்தூள் – 1 டீஸ்பூன், மஞ்சள்தூள் – 1 டீஸ்பூன், கருவேப்பிலை – 1 டீஸ்பூன், பருப்பு கடைந்த தண்ணீர் – 2 கப், கடுகு – 1 டீஸ்பூன், வெந்தயம் – ½ டீஸ்பூன், சீரகம் – ½ டீஸ்பூன்., வரமிளகாய் – 1, கருவேப்பிலை – 1 இணுக்கு, உப்பு – ½ டீஸ்பூன், கொத்துமல்லித் தழை அரிந்தது – 1 டீஸ்பூன்

 


செய்முறை:- நெய்யைக் காயவைத்து கடுகு போடவும். வெடித்ததும் வெந்தயம் சீரகம் போட்டு பொரிந்ததும் அதிலேயே இரண்டாகக் கிள்ளிய வரமிளகாய், கருவேப்பிலை போடவும். அதில் வேப்பம்பூவைப் போட்டுப் புரட்டி வறுத்து பருப்பு கடைந்த தண்ணீரை ஊற்றவும். அதில் மிளகு சீரகத்தூளையும் மஞ்சள் பொடியையும் உப்பையும் சேர்க்கவும். நுரைத்து வரும்போது இறக்கி ஒரு எலுமிச்சையை விதையில்லாமல் சாறு பிழிந்து சேர்த்து கொத்துமல்லித் தழை போட்டு மூடி வைக்கவும். சிறிது நேரம் கழித்து உபயோகிக்கவும்

 

புதன், 3 நவம்பர், 2021

9.வேப்பம்பூ வெல்லப் பச்சடி

9.வேப்பம்பூ வெல்லப் பச்சடி

 


தேவையானவை :- வேப்பம்பூ - காயவைத்தது 2 கைப்பிடி, பாசிப்பருப்பு - 1 கைபிடி, வெல்லம் - 1 டேபிள் ஸ்பூன், புளி - 2 சுளை, உப்பு - 1/2 டீஸ்பூன், தாளிக்க:-, நெய் - 2 டீஸ்பூன், கடுகு - 1/2 டீஸ்பூன், சீரகம் - 1/2 டீஸ்பூன், காய்ந்த மிளகாய் - 1 இரண்டாக கிள்ளி வைக்கவும்.

 

செய்முறை :- பாசிப்பருப்பை வேகவைக்கவும். அதில் உப்பு புளியைக் கரைத்து ஊற்றிக் கொதிக்கும்போது நெய்யில் கடுகு , சீரகம், காய்ந்த மிளகாய், வேப்பம்பூ ஆகியவற்றைப் பொன்னிறமாக வறுத்துப் போடவும். ஒரு கொதி வந்ததும் வெல்லம் சேர்த்து இறக்கவும். நீர்க்க இருந்தால் ஒரு டீஸ்பூன் பச்சரிசி மாவு கரைத்து ஊற்றவும். இதில் உப்பு, புளிப்பு, கசப்பு இனிப்பு காரம் எல்லாம் இருக்கும்

 

வியாழன், 28 அக்டோபர், 2021

8.குங்குமப்பூ பால் ப்ரெட்

8.குங்குமப்பூ பால் ப்ரெட்

 


தேவையானவை:- பால் - அரை லிட்டர், குங்குமப்பூ -2 கி, சர்க்கரை – ஒரு டேபிள் ஸ்பூன், மில்க் ப்ரெட் – 8 ஸ்லைஸ்.

 

செய்முறை:- பாலைக் காய்ச்சவும். கொதி வந்ததும் குங்குமப்பூவையும் சர்க்கரையையும் சேர்த்து ஐந்து நிமிடம் நிறம் மாறும் வரை காய்ச்சி இறக்கவும். மில்க்


ப்ரெட்டை அப்படியேவோ அல்லது டோஸ்ட் செய்தோ தனித்தனி ப்ளேட்டுகளில் அடுக்கவும். குங்குமப்பூ பால் சூடு அடங்கி வெதுவெதுப்பாய் வந்ததும் ப்ரெட் ஸ்லைஸ்களின் மேல் ஊற்றிப் பரிமாறவும். 

திங்கள், 25 அக்டோபர், 2021

7.குங்குமப்பூ கல்கண்டு சாதம்

7.குங்குமப்பூ கல்கண்டு சாதம்

 


தேவையானவை :- பாசுமதி அரிசி – 1 கப், குங்குமப்பூ – 2 கி, பால் – 2 கப், கல்கண்டு – 1 டேபிள்  ஸ்பூன்உப்பு – 1 சிட்டிகை, நெய் – 1 டேபிள் ஸ்பூன், முந்திரி – 6, பாதாம் – 6, கிஸ்மிஸ் – 6, பட்டை  இலை – 1 சிறுதுண்டு, ஏலக்காய் – 3, கிராம்பு – 1, ஆப்பிள் – ½ இன்ச் துண்டுகள் = 6 பைனாப்பிள் – ½ இன்ச் துண்டுகள் = 6.

 


செய்முறை:- பாதாம் முந்திரியை ஊறவைத்து நான்காக நறுக்கிக் கொள்ளவும். பாசுமதி அரிசியைக் களைந்து 10 நிமிடம் ஊறவைக்கவும். தண்ணீரை வடித்துவிட்டு பால் ஊற்றிக் குக்கரில் வேகப் போடவும். ஒரு டேபிள் ஸ்பூன் பாலை சூடுபடுத்திக் குங்குமப்பூவைப் போட்டு வைக்கவும். பாசுமதி அரிசி வெந்ததும் உதிர்த்துக்கொள்ளவும். பானில் நெய்யைக் காயவைத்துப் பட்டை இலை, ஏலக்காய், கிராம்பு தாளிக்கவும். அதில் முந்திரி பாதாமைப் போட்டு வதக்கி கிஸ்மிஸ், ஆப்பிள், பைனாப்பிளை சேர்க்கவும். உப்பையும் பொடித்த கல்கண்டையும் சேர்த்து பாலில் கரைத்த குங்குமப்பூவை ஊற்றவும். வேகவைத்த பாசுமதி சாதத்தையும் போட்டு நன்கு கலந்து சிறிது நேரம் வைத்திருந்து உபயோகப் படுத்தவும்.

 
Related Posts Plugin for WordPress, Blogger...