மிளகு சீரக சாதம்

மிளகு சீரக சாதம்

தேவையானவை:-சீரகசம்பா சாதம் – 1 கப், மிளகு – 10, சீரகம் – 1 டீஸ்பூன், நெய் – 3 டீஸ்பூன், முந்திரிப் பருப்பு – 10, கருவேப்பிலை – 1 இணுக்கு. உப்பு – அரை டீஸ்பூன்.

செய்முறை:- மிளகு சீரகத்தை ஒன்றிரண்டாகப் பொடித்து வைக்கவும். முந்திரிப்பருப்பை இரண்டாக உடைத்து வைக்கவும். நெய்யைக் காயவைத்து முந்திரியை வறுத்துக் கருவேப்பிலையைச் சேர்க்கவும். அதிலேயே உப்பையும் மிளகு சீரகப் பொடியையும் உதிர்த்த சீரகச்சம்பா சாதத்தையும் போட்டு அடுப்பை அணைக்கவும். பின்பு மெல்ல நன்றாகக் கிளறி விட்டுப் பரிமாறவும். 

இது செரிமானம் கொடுக்கும். ஜீரண சக்தியை அதிகரிக்கும்.

 

கோதுமை பொரியரிசி மாவு

கோதுமை பொரியரிசி மாவு

தேவையானவை:- சம்பாக் கோதுமை – 2 ஆழாக்கு, ஜீனி அல்லது வெல்லம் – 1 டேபிள் ஸ்பூன்

செய்முறை:-

கோதுமையைக் கழுவிக் காயவைத்து வாணலியில் கொஞ்சம் கொஞ்சமாகப் போட்டு வாசம் வரும்வரை பொன்னிறமாக வறுத்தெடுக்கவும். மிஷினில் அரைத்துக் கொள்ளவும். சாப்பிடும்போது ஜீனி அல்லது வெல்லம் கலந்து தண்ணீர் சேர்த்துப் பிசைந்து கொடுக்கவும்.

 இது விரத நாட்களில் சாப்பிட உகந்தது. முழுமையான ஊட்டச்சத்துக் கொண்டது.

 

இஞ்சித் துவையல்

இஞ்சித் துவையல்

தேவையானவை:- இஞ்சி – 50 கிராம், உளுந்தம்பருப்பு – கால் கப், வரமிளகாய் – 2, உப்பு – அரை டீஸ்பூன்.

செய்முறை:- வெறும் வாணலியில் வரமிளகாய், உளுந்தம்பருப்பை வாசனை வரும்வரை வறுக்கவும். இஞ்சியைக் கழுவித் துண்டுகளாக்கவும். வறுத்த வரமிளகாய், உளுந்தம்பருப்பு , இஞ்சி, உப்பு சேர்த்து மைய அரைக்கவும். இட்லி தோசையுடன் பரிமாறவும். இந்தத் துவையல் சளியை நீக்கும். பசியைத் தூண்டும்.

 

காரட் தக்காளி சூப்

காரட் தக்காளி சூப்

தேவையானவை:- காரட் – 1, தக்காளி – 1, வெங்காயம் -1, உப்பு – அரை டீஸ்பூன், பால் – கால் கப், பட்டை, இலை, கிராம்பு, ஏலக்காய் – தலா 1.

செய்முறை:- ஒரு ப்ரஷர் பானில் காரட் தக்காளி வெங்காயத்தைப் பெரிய துண்டுகளாக வெட்டிப் போட்டு இரண்டரை கப் தண்ணீர் ஊற்றவும். அதில் பட்டை கிராம்பு ஏலக்காய் இலை எல்லாவற்றையும் போட்டு ஒரு விசில் வரும்வரை வேகவைத்து இறக்கவும். பட்டை, கிராம்பு, ஏலக்காய்,, இலையை நீக்கிவிட்டு காரட் தக்காளி வெங்காயத்தை எடுத்து மிக்ஸியில் அரைக்கவும். அதே தண்ணீரில் போட்டு உப்புச் சேர்த்துக் கொதிக்க விடவும். பால்சேர்த்து அருந்தக் கொடுக்கவும். 

இது சத்துக்குறைச்சலைப் போக்கும். பெரியவர்கள் குழந்தைகளுக்கு ஏற்ற உணவு.

 

சௌசௌ கூட்டு

சௌசௌ கூட்டு

தேவையானவை:- சௌசௌ – 1, பாசிப்பருப்பு + கடலைப்பருப்பு – தலா ஒரு டேபிள் ஸ்பூன், பச்சை மிளகாய் -1, பெரிய வெங்காயம் – பாதி, சீரகம் – அரை டீஸ்பூன், உப்பு – அரை டீஸ்பூன். தாளிக்க- எண்ணெய் – ஒரு டீஸ்பூன், உளுந்து, சீரகம் தலா அரை டீஸ்பூன். கருவேப்பிலை – 1 இணுக்கு.  

செய்முறை:- சௌசௌவைத் தோல் சீவிப் பொடிப்பொடியாக அரியவும். பாசிப்பருப்பையும் கடலைப்பருப்பையும் கழுவி அரைமணிநேரம் ஊறவைக்கவும். பெரிய வெங்காயத்தையும் பொடியாக அரியவும். பச்சைமிளகாயைக் கீறி வைக்கவும். ஒரு ப்ரஷர் பானில் ஊறவைத்த பருப்புகள்,சௌசௌ, வெங்காயம், பச்சை மிளகாய், சீரகத்தைப் போட்டு ஒரு விசில் வைத்து இறக்கி உப்பு சேர்த்து மசிக்கவும். எண்ணெயில் உளுந்து சீரகம் கருவேப்பிலை தாளித்துக் கொட்டவும். 

இது வாய்க்கு இதமான இளசான கூட்டு.