முளைக்கீரைக் கூட்டு

முளைக்கீரைக் கூட்டு

தேவையானவை:- முளைக்கீரை, ஆய்ந்து கழுவி சுத்தம் செய்தது - 1 கட்டு, பாசிப்பருப்பு - 1/4 கப், பெரிய வெங்காயம், பொடியாக அரிந்தது - 1/4 கப், பூண்டு தோலுரித்து நசுக்கியது - 2 பல், சீரகம் - 1 டீஸ்பூன்,  பச்சை மிளகாய் - 1, தண்ணீர் -1/2 டம்ளர், உப்பு - ருசிக்குத் தேவையான அளவு. எண்ணெய் - ஒரு டீஸ்பூன். 

செய்முறை:- முளைக்கீரையைக் கழுவிப் பொடியாக நறுக்கி எண்ணெயில் வதக்கி வைக்கவும்.அதனுடன் ஊறவைத்த பாசிப்பருப்பு., வெங்காயம்., பூண்டுப் பல்., ரெண்டாக வகிர்ந்த பச்சை மிளகாய்., ஜீரகம்., தண்ணீர் மற்றும் உப்புடன் பிரஷர் பானில் போடவும். இரண்டு விசில் சத்தம் வரும் வரை வைத்திருந்து அடுப்பை அணைக்கவும். பத்து நிமிடங்களுக்குப் பிறகு பானைத்திறந்து., ஒரு மத்து அல்லது கரண்டியால் மசிக்கவும்.. சாதத்தில் நெய்யும் கீரையும் போட்டு சாப்பிடலாம் அல்லது வெங்காயம் வெள்ளைப்பூண்டுக் குழம்பு சாதத்துக்கு தொட்டுக் கொள்ளலாம்..

 

பொரி மசால்

பொரி மசால்

தேவையானவை:- பொரி - 1 கப், காரட் 1 -  துருவியது , பெரிய வெங்காயம் - 1/4 பொடியாக அரிந்தது, மல்லித்தழை - 2 டீஸ்பூன் பொடியாக அரிந்தது, மிளகாய்ப் பொடி - கால் டீஸ்பூன், சாட் மசாலா - கால் டீஸ்பூன். பொரியில் உப்பு இருக்கும் என்பதால் சேர்க்க வேண்டாம். 

செய்முறை:- பொரியில் துருவிய காரட், பெரிய வெங்காயம், மல்லித்தழை, மிளகாய்ப்பொடி, சாட் மசாலா கலந்து உபயோகிக்கவும். கலந்தவுடன் சாப்பிட வேண்டும் . கலந்து வைத்தால் நமத்து விடும். 

 

புதினா மிளகு பக்கோடா

புதினா மிளகு பக்கோடா:-

தேவையானவை :- கடலை மாவு – 1 கப் அரிசி மாவு – 1 டேபிள் ஸ்பூன், புதினா – ½ கப், சோம்பு – ¼ டீஸ்பூன், உப்பு – ¼ டீஸ்பூன், மிளகாய்த் தூள் – ¼ டீஸ்பூன்,மிளகு - 20, வெண்ணெய் – 1 டீஸ்பூன் எண்ணெய் – பொறிக்கத் தேவையான அளவு

செய்முறை:- புதினாவை ஆய்ந்து கழுவி பொடிப் பொடியாக நறுக்கவும். கடலை மாவு அரிசி மாவு உப்பு சோம்பு மிளகாய்த் தூளை நன்கு கலந்து வெண்ணெயும் புதினாவும், ஒன்றிரண்டாக உடைத்த மிளகும் சேர்க்கவும். லேசாக தண்ணீர் தெளித்து பிரட்டினாற்போலப் பிசைந்து எண்ணெயைக் காயவைத்து மாவை உதிர்த்து பகோடாக்களாக வேக வைக்கவும். மிளகாய்ச் சட்னியுடன் பரிமாறவும்.

 

பேபிகார்ன் சூப்

பேபிகார்ன் சூப்:-

தேவையானவை:- பேபிகார்ன்  - 4, வேகவைத்த துவரம்பருப்பு - 1 டேபிள் ஸ்பூன், பெரிய வெங்காயம் - 1 நீளமாக நறுக்கவும், தக்காளி - 1 துண்டுகளாக்கவும்., பச்சை மிளகாய் - 1 இரண்டாக வகிரவும், மஞ்சள் தூள் - 1 சிட்டிகை, எண்ணெய் , நெய் - 2 டீஸ்பூன், உளுந்து - 1/2 டீஸ்பூன், சோம்பு - 1/3 டீஸ்பூன், சீரகம் - 1/2 டீஸ்பூன், மிளகு - 1 டீஸ்பூன், பட்டை - 1 இன்ச், இலை - இன்ச், கல்பாசிப்பூ - 1 இன்ச், ஏலக்காய் - 1, கருவேப்பிலை - 1 இணுக்கு., கொத்துமல்லி தழை - 1 டீஸ்பூன்., உப்பு - 1 டீஸ்பூன், பால் - 1 டேபிள் ஸ்பூன்.

செய்முறை:-

பேபிகார்னை மெல்லிய  வட்டத் துண்டுகளாக வெட்டவும். ஒரு பானில் எண்ணெய்/ நெய் ஊற்றி உளுந்து, சோம்பு, சீரகம்., மிளகு, கல்பாசிப்பூ., பட்டை., இலை., ஏலக்காய் போட்டு தாளிக்கவும். அதில் வெங்காயம், தக்காளி., கருவேப்பிலை., பச்சை மிளகாய், பேபிகார்ன் போட்டு நன்கு வதக்கவும். துவரம்பருப்பை நன்கு மசித்து 3 கப் தண்ணீர் ஊற்றி உப்பு, மஞ்சள் தூள் சேர்த்து பானில் ஊற்றவும். கொதி வந்ததும் சிம்மில் மூடி போட்டு 7 நிமிடம் வேக விடவும். பால் ஊற்றி கொத்துமல்லித்தழை சேர்த்து வறுத்த அரிசி வத்தல்களுடன் பரிமாறவும்.

 

கொள்ளுப் பொரியல்.

கொள்ளுப் பொரியல். 

தேவையானவை :- கொள்ளு - அரை கப், சின்ன வெங்காயம் -2, பூண்டு - 1 பல், வரமிளகாய் 1, உப்பு - கால் டீஸ்பூன், எண்ணெய் - 1 டீஸ்பூன், கடுகு -கால் டீஸ்பூன்

செய்முறை:- வெறும் வாணலியில் கொள்ளை வாசம் வரும்வரை வறுத்து நீரில் ஊறப்போடவும். அரைமணி நேரம் கழித்து அதைக் களைந்து குக்கரில் போட்டு அரை கப் தண்ணீர் ஊற்றி இரண்டு மூன்று விசில் வரும்வரை வேகவிடவும். நீரை வடித்து வைக்கவும். 

வரமிளகாய் சின்ன வெங்காயம் பூண்டை உப்போடு அரைத்து வைக்கவும். ஒரு பானில்  எண்ணெய்யைக் காயவைத்துக் கடுகு போட்டு வெடித்ததும் அரைத்த மசாலாவையும் கொள்ளையும் போட்டு உடனே அடுப்பை அணைக்கவும். அதிகம் வேகவைக்கக் கூடாது. வெங்காயம் பூண்டின் பச்சை வாசனையோடு உண்பது சுவையாய் இருக்கும். 

எனவே அடுப்பில் இருந்து இறக்கி நன்கு கிளறி உண்ணக் கொடுக்கவும். இது உடல் எடையைக் குறைக்கும், ஊளைச் சதையையும் குறைக்கும். பூண்டு சேர்ப்பதால் வாய்வு பிடிக்காது.