வெற்றிலை நெல்லிக்காய் ரசம்

வெற்றிலை நெல்லிக்காய் ரசம்

 

தேவையானவை:-முழு நெல்லிக்காய் - 4, ,வெற்றிலை - 8,

கருவேப்பிலை கொத்துமல்லி – ஒரு கைப்பிடி. , வரமிளகாய் – 2, வெள்ளைப்பூண்டு – 3 பல், குறு மிளகு – ½ டீஸ்பூன், சீரகம் _ ½ டீஸ்பூன், மஞ்சள் தூள் – 1 சிட்டிகை, நல்லெண்ணெய் – 1 டீஸ்பூன், உப்பு – ½ டீஸ்பூன்.

 

செய்முறை:- நெல்லிக்காயைக் கொட்டை நீக்கிச் சிறிது தண்ணீர் சேர்த்து மிக்ஸியில் அரைத்துக்கொள்ளவும். எண்ணெய் ஊற்றாமல் மிளகாய், பூண்டு வால்மிளகு சீரகம் ஆகியவற்றை கடாயில் வறுத்து அதில் சுத்தம் செய்து நறுக்கிய கருவேப்பிலை, கொத்துமல்லி, வெற்றிலை போட்டு மஞ்சள்தூள் சேர்த்து வதக்கவும். இதை ஆறவைத்து அரைத்து எண்ணெயில் வதக்கவும். அரைத்த நெல்லிக்காய் பேஸ்டையும் போட்டு 2 கப் தண்ணீர் ஊற்றவும். உப்பைப் போடவும். நுரைத்துக் கொதிவரும் நிலையில் கொதிக்குமுன் இறக்கி வடிகட்டிக் கொடுக்கவும். இது சளியைப் போக்கும்.

 

 

இன்ஸ்டண்ட் தக்காளி ரசம்.

இன்ஸ்டண்ட் தக்காளி ரசம்.

 

தேவையானவை:- தக்காளி – 3, துவரம்பருப்பு – 1 டீஸ்பூன், வரமிளகாய் – 1, மிளகு – ½ டீஸ்பூன், சீரகம் – 1 டீஸ்பூன், பூண்டு – 2 பல் , சாம்பார் பொடி – ½ டீஸ்பூன், மஞ்சள் பொடி – ¼ டீஸ்பூன், பெருங்காயம் – சிறு துண்டு, கருவேப்பிலை கொத்துமல்லி – சிறிது, எண்ணெய் – 1 டீஸ்பூன், கடுகு – 1 டீஸ்பூன், வெந்தயம் – ½ டீஸ்பூன், உப்பு – 1 டீஸ்பூன்.

 

செய்முறை:-மிக்ஸியில் துண்டாக நறுக்கிய தக்காளி, துவரம்பருப்பு, வரமிளகாய், மிளகு, சீரகம், பூண்டு, சாம்பார் பொடி, மஞ்சள் பொடி, பெருங்காயம், கருவேப்பிலை, கொத்துமல்லி போட்டு சிறிது தண்ணீர் விட்டு ஒரு நிமிடம் ஓட்டி கொரகொரப்பாக அரைத்து எடுக்கவும். இதை இரண்டு கப் தண்ணீரில் கரைத்து வைக்கவும்.பானில் எண்ணெயைக் காயவைத்து கடுகும் வெந்தயமும் வறுத்து கரைத்த தக்காளித் தண்ணீரை ஊற்றி ஒரு கொதி வந்ததும் இறக்கவும். வெந்தயம் போடுவதால் தக்காளியுடன் கொதித்தால் நல்ல ருசி கொடுக்கும். புளி போடாததால் கொதித்தவுடன் இறக்கினாலும் இந்த ரசம் கடுத்துப் போகாது.

 

தூதுவளை ரசம்

தூதுவளை ரசம்

 

தேவையானவை :-தூதுவளை – 1 கட்டு , வேகவைத்த துவரம்பருப்பு – 1 டேபிள் ஸ்பூன், புளி – 1 நெல்லிக்காய் அளவு, உப்பு – ½ டீஸ்பூன், வரமிளகாய் – 2, மிளகு – 1/2 டீஸ்பூன், சீரகம் – 1 டீஸ்பூன், பெருங்காயத்தூள் – 1 சிட்டிகை, மல்லித்தூள் – ½ டீஸ்பூன், மஞ்சள் தூள் – ¼ டீஸ்பூன், பூண்டுப்பல் – 2, கடுகு – 1 டீஸ்பூன், வெந்தயம் – ½ டீஸ்பூன், சீரகம் – ½ டீஸ்பூன், எண்ணெய் – 1 டீஸ்பூன்

 

செய்முறை:- தூதுவளைக் கீரை முள்ளுடன் இருக்கும் கீரையை மட்டும் பார்த்து ஆய்ந்து கழுவி வைக்கவும். உரலில் மிளகாய், மிளகு சீரகம் பொடித்து பூண்டு தூதுவளைக் கீரையை வைத்து ஒன்றிரண்டாக நைத்து வைக்கவும். புளியை ஊறவைத்து இரண்டு கப் சாறு எடுத்து உப்பு சேர்த்து வைக்கவும். பருப்பை கடைந்து புளித்தண்ணீரில் சேர்க்கவும். அதில் மஞ்சள் தூளையும் மல்லித் தூளையும் போடவும். கடாயில் எண்ணெயைக் காயவைத்துக் கடுகு போட்டு வெடித்ததும் சீரகம், வெந்தயம் பெருங்காயப் பொடி போடவும். அதில் நைத்த விழுதைப் போட்டு அரை நிமிடம் வதக்கி புளித்தண்ணீரை ஊற்றவும். நுரைத்துப் பொங்கி வரும்போது கொதிக்கவிடாமல் இறக்கி உபயோகிக்கவும். இது சள்ளைக் கடுப்பை நீக்கும்.

 

வேப்பம்பூ எலுமிச்சை ரசம்

வேப்பம்பூ எலுமிச்சை ரசம்

 

தேவையானவை:- வேப்பம்பூ – 1 கைப்பிடி, எலுமிச்சை – 1., நெய் – 1 டீஸ்பூன், மிளகு சீரகத்தூள் – 1 டீஸ்பூன், மஞ்சள்தூள் – 1 டீஸ்பூன், கருவேப்பிலை – 1 டீஸ்பூன், பருப்பு கடைந்த தண்ணீர் – 2 கப், கடுகு – 1 டீஸ்பூன், வெந்தயம் – ½ டீஸ்பூன், சீரகம் – ½ டீஸ்பூன்., வரமிளகாய் – 1, கருவேப்பிலை – 1 இணுக்கு. , உப்பு – ½ டீஸ்பூன், கொத்துமல்லித் தழை அரிந்தது – 1 டீஸ்பூன்

 

செய்முறை:-நெய்யைக் காயவைத்துக் கடுகு போடவும். வெடித்ததும் வெந்தயம் சீரகம் போட்டு பொரிந்ததும் அதிலேயே இரண்டாகக் கிள்ளிய வரமிளகாய், கருவேப்பிலை போடவும். அதில் வேப்பம்பூவைப் போட்டுப் புரட்டி வறுத்து பருப்பு கடைந்த தண்ணீரை ஊற்றவும். அதில் மிளகு சீரகத்தூளையும் மஞ்சள் பொடியையும் உப்பையும் சேர்க்கவும். நுரைத்து வரும்போது இறக்கி ஒரு எலுமிச்சையை விதையில்லாமல் சாறு பிழிந்து சேர்த்து கொத்துமல்லித் தழை போட்டு மூடி வைக்கவும். சிறிது நேரம் கழித்து உபயோகிக்கவும். இது பித்தத்தைப் போக்கும்.

 

இளநீர் ரசம்

இளநீர் ரசம்

 

தேவையானவை:-, இளநீர் – 2, துவரம்பருப்பு வேகவைத்தது – 1 டேபிஸ் ஸ்பூன், தக்காளி – 1 , மிளகு – 1 டீஸ்பூன்,, சீரகம் – 1 டீஸ்பூன், கடுகு – ½ டீஸ்பூன், வெந்தயம் – ½ டீஸ்பூன், மிளகாய் – 1, பெருங்காயத்தூள் – 1 சிட்டிகை., உப்பு – 1 டீஸ்பூன், புளி – 2 சுளை., எண்ணெய்/நெய் – 2 டீஸ்பூன்,, கருவேப்பிலை – 1 இணுக்கு.

 

செய்முறை:- உப்புப் புளியை ½ கப் தண்ணீரில் கரைத்து அதில் தக்காளியையும் (இளநீரைத் தனியாக எடுத்து வைத்து விட்டு) இளநீர் வழுக்கையையும் போட்டுப் பிசைந்து வைக்கவும். அதில் மிளகாய், மிளகு , சீரகத்தைப் பொடித்துப் போடவும்.வேகவைத்த துவரம் பருப்பைக் கரைத்து ஊற்றவும். எண்ணெயை/நெய்யைக் காயவைத்துக் கடுகு சீரகம், வெந்தயம் தாளித்து கருவேப்பிலை பெருங்காயப் பொடி போட்டுக் கரைத்து வைத்த கலவையை ஊற்றவும். அது சூடேறி வரும்போது இளநீரை ஊற்றி ஒரு கொதி வந்ததும் இறக்கவும்.

 

பாதாம் ஷோர்பா ( ஆல்மோண்ட் சூப்)

பாதாம் ஷோர்பா ( ஆல்மோண்ட் சூப்)

தேவையானவை:- பாதாம் – 1 கைப்பிடி, பால் – ஒன்றரை கப், தண்ணீர் – ஒன்றரை கப், வெண்ணெய் – 1 டீஸ்பூன், ஆல் பர்ப்பஸ் மாவு – அரை டீஸ்பூன், உப்பு – கால் டீஸ்பூன், சீனி – ஒரு சிட்டிகை, கரம் மசாலா – 1 சிட்டிகை, வெள்ளை மிளகுத்தூள் – கால் டீஸ்பூன்.

செய்முறை:- பாதாமை வெந்நீரில் ஒருமணி நேரம் ஊறவைத்துத் தோலுரிக்கவும். இரண்டு மூன்று பாதாமை அலங்கரிக்க எடுத்து வைத்துவிட்டு மிச்சத்தை அரைக் கப் பால் ஊற்றி நன்கு அரைக்கவும். ஒரு பானில் வெண்ணெயை உருகவைத்து ஆல் பர்ப்பஸ் மாவை சேர்த்து வாசம் வரும்படி நிறம் மாறாமல் வறுத்துப் பாலைச் சேர்த்துக் கரைத்துக் கொதிக்க விடவும். இது கொதிக்கும்போது அரைத்த பாதாமைச் சேர்த்து ஒன்றரைக் கப் நீர் ஊற்றி இன்னும் கொதிக்க வைக்கவும். இரு நிமிடம் கொதித்ததும் உப்பு, வெள்ளை மிளகுத்தூள், கரம் மசாலாத்தூள், ஒரு சிட்டிகை ஜீனி சேர்த்து நன்கு கலக்கி இறக்கி சீய்த்த பாதாமால் அலங்கரிக்கவும். வெதுவெதுப்பாக அருந்தக் கொடுக்கவும்.

 

காலிஃப்ளவர் சூப்

காலிஃப்ளவர் சூப்

 

தேவையானவை:- காலிஃப்ளவர் – 10 பூ,  பெரிய வெங்காயம் – 1, தக்காளி – 1, பச்சை மிளகாய் – 1, கருவேப்பிலை – 1 இணுக்கு, மஞ்சள் தூள் – 1 சிட்டிகை, பருப்பு கடைந்த தண்ணீர் – 2 கப்,  எண்ணெய் – 1 டீஸ்பூன், சோம்பு – ½ டீஸ்பூன், சீரகம் – ½ டீஸ்பூன், மிளகு – ½ டீஸ்பூன், கருவேப்பிலை – 1 இணுக்கு, கல்பாசிப்பூ – 1 துண்டு, பட்டை – 1 துண்டு, உப்பு – ½ டீஸ்பூன், கொத்துமல்லித்தழை – சிறிது.

 

செய்முறை:- காலிஃப்ளவர் பூக்களை உப்பு கலந்த வெந்நீரில் போட்டு எடுத்து வைக்கவும். பெரிய வெங்காயம் தக்காளியை நீளவாக்கில் நறுக்கவும். பச்சை மிளகாயைக் கீறி வைக்கவும்.

பானில் எண்ணெயைக் காயவைத்து சோம்பு சீரகம் மிளகு போடவும், இதில் கல்பாசிப்பூ, பட்டை போட்டு அனைத்தும் பொரிந்ததும் கருவேப்பிலை, பச்சை மிளகாய் காலிஃப்ளவர் போட்டு வதக்கவும். ஒரு நிமிடம் வதக்கியபின் வெங்காயம் தக்காளியைச் சேர்த்து வதக்கவும். இதில் மஞ்சள் பொடியைப்போட்டு பருப்பு கரைத்த தண்ணீரை ஊற்றிக் கொதிக்க விடவும். நன்கு கொதித்து வெந்ததும் உப்பு சேர்த்துக் கொத்துமல்லித்தழை தூவி அருந்தக் கொடுக்கவும்.

 

எவர்க்ரீன் சூப்

கருவேப்பிலை கொத்துமல்லி புதினா தளிர் சூப்

 

தேவையானவை:-(ஒரு கட்டு கருவேப்பிலை, ஒரு கட்டு புதினா, ஒரு கட்டு கொத்துமல்லியில்) ஆய்ந்த தளிர் இலைகள் மட்டும். – தலா ஒரு பெரிய கைப்பிடி. அளவு எடுத்து அலசி வைக்கவும், பெரிய வெங்காயம் – 1, தக்காளி – 1, பச்சைமிளகாய் – 1 , வேகவைத்த துவரம்பருப்பு – 1 டேபிள் ஸ்பூன், பட்டை – 1, இலை – 1, கல்பாசிப்பூ -1, சோம்பு -1/2 டீஸ்பூன், சீரகம் – ½ டீஸ்பூன், மிளகு – ½ டீஸ்பூன், மஞ்சள் பொடி – 1 சிட்டிகை, உப்பு – ½ டீஸ்பூன், எண்ணெய் – 1 டீஸ்பூன், பால் – 1 டேபிள் ஸ்பூன், மிளகுத்தூள் – ½ டீஸ்பூன்

 

செய்முறை:-பெரிய வெங்காயம் தக்காளியை நீளமாக நறுக்கிக்கொள்ளவும்.  பச்சைமிளகாயை இரண்டாகக் கீறிக் கொள்ளவும். கடாயில் எண்ணெயைக் காயவைத்து சோம்பு சீரகம் மிளகு, பட்டை, இலை, கல்பாசிப்பூ தாளித்து வெங்காயம் தக்காளி பச்சை மிளகாய் ஆய்ந்து கழுவிய தளிர் இலைகள் போட்டு ஒரு நிமிடம் வதக்கவும். மஞ்சள்தூள் உப்பு வேகவைத்த பருப்பு சேர்த்து ஒரு கப் தண்ணீர் ஊற்றி குக்கரில் ஒரு விசில் வரும்வரை வைக்கவும்.ஆறியதும் திறந்து பச்சை மிளகாயை எடுத்துப் போட்டு விட்டு  நன்கு மசித்து அந்தச் சாறை வடிகட்டி எடுக்கவும். திரும்ப ஒரு கப் தண்ணீர் ஊற்றி நன்கு மசித்து வடிகட்டவும். பருப்பும் வெங்காயமும் தக்காளியும் கரைந்து வரும்வரை இன்னும் அரை கப் தண்ணீர் கூட ஊற்றி வடிகட்டி எடுக்கலாம். வடிகட்டிய இரண்டரை கப் சூப்பில் உப்பு சேர்த்து அடுப்பில் வைத்து சூடுபடுத்தவும். இறக்கி பாலும் மிளகுத்தூளும் கலந்து குடிக்கக் கொடுக்கவும்.

 

காரட், தக்காளி சூப்

காரட், தக்காளி சூப்

 

தேவையானவை:- காரட் – 1 பெரிது, தக்காளி – 1 பெரிது, பெரிய வெங்காயம் – 1, வெள்ளை சாஸ் செய்ய :- வெண்ணெய் – 2 டீஸ்பூன், மைதா – 2 டீஸ்பூன், பால் – ½ கப், பட்டை இலை பூ ஏலக்காய் – எல்லாம் தலா ஒன்று., மிளகுத்தூள் – 1/4 டீஸ்பூன், உப்பு – ½ டீஸ்பூன்., க்ரீம் –  2 டீஸ்பூன் ( ஆப்ஷனல் )

 

செய்முறை:- காரட் பெரிய வெங்காயம் தக்காளியைத் துண்டுகளாக்கி குக்கரில் போடவும். அதில் ஒரு கப் தண்ணீர் ஊற்றி பட்டை இலை பூ ஏலக்காயை ஒரு வெள்ளைத் துணியில் முடிச்சாகக் கட்டிப் போடவும். ஒரு விசில் வரும்வரை வேகவைத்து ஆறவைக்கவும்.  பட்டை இலை மூடிச்சை எடுத்துப் போட்டு விட்டுக் காய்களை அரைத்து வடிகட்டவும். கடாயை சூடாக்கி அதில் வெண்ணெய் போடவும் வெண்ணெய் உருகும்போது மைதா சேர்த்துப் புரட்டவும். ஒரு நிமிடம் புரட்டியபின் பால் ஊற்றிக் கட்டிகள் இல்லாமல் கலந்து வேகவிடவும். கண்ணாடிபோல் வந்ததும் இறக்கி ஆறவிடவும். பரிமாறும்போது இரண்டு சாஸ்களையும் சூடாக்கி கப்பில் ஊற்றி அதில் உப்பு மிளகுத்தூள் தூவி அரை ஸ்பூன் க்ரீம் ஊற்றி சூப்ஸ்டிக்குடன் பரிமாறவும். இது எனர்ஜி கொடுக்கும்.

வாழைத்தண்டு/பீட்ரூட்/காரட் சூப்

வாழைத்தண்டு/பீட்ரூட்/காரட் சூப்

 

தேவையானவை:- சின்ன வாழைத்தண்டு  - 1 அல்லது பீட்ரூட் பெரிது – 1 அல்லது காரட்  பெரிது 1., பாசிப்பருப்பு +துவரம்பருப்பு – 1 டேபிள் ஸ்பூன், சின்ன வெங்காயம் – 10, சின்னச் சீரகம் – 1 டீஸ்பூன், கசகசா – ½ டீஸ்பூன், மஞ்சள் தூள் – 1 சிட்டிகை, உப்பு – ½ டீஸ்பூன், கொழுந்து கருவேப்பிலை – சிறிது., எண்ணெய் – 1 டீஸ்பூன்.

 

செய்முறை:-

 

பருப்புவகைகளுடன் வட்டமாக அரிந்த வாழைத்தண்டோ அல்லது ஸ்லைஸாக நறுக்கிய பீட்ரூட்டோ அல்லது துருவிய காரட்டோ போட்டு மஞ்சள்தூள் சேர்த்து குக்கரில் வேகவைத்து கரண்டியால் லேசாக மசித்து அரை கப் தண்ணீர் சேர்க்கவும். சின்னச் சீரகத்துடன் கசகசகா சின்ன வெங்காயம் இரண்டு வைத்து அரைத்து வைக்கவும். மிச்ச வெங்காயத்தை வளையம் வளையமாக நைஸாக அரிந்து வைக்கவும்.கடாயில் எண்ணெய் ஊற்றி வெங்காயத்தை மென்மையாக வதக்கவும். அதில் அரைத்த விழுதைப் போட்டு வதக்கி காய்கறி பருப்புக் கலவையை ஊற்றவும். தேவையான தண்ணீர் சேர்த்து உப்புப் போடவும். கொதி வந்ததும் இறக்கி கொழுந்து கருவேப்பிலை தூவிக் குடிக்கக் கொடுக்கவும். இது தொண்டைப்புண் கரகரப்பு வலி போக்கும் வயிற்றுப்புண்ணையும் போக்கும்.