மல்லிப் பச்சடி

மல்லிப் பச்சடி

தேவையானவை:- கொத்துமல்லி – 1 கட்டு, பாசிப்பருப்பு – அரை கப், பெரியவெங்காயம் – 1, கத்திரிக்காய் -1, தக்காளி -1 பச்சைமிளகாய் – 2, சாம்பார் பொடி – அரை டீஸ்பூன், மஞ்சள்பொடி – ஒரு சிட்டிகை, புளி – 1 சுளை, உப்பு – அரை டீஸ்பூன், தாளிக்க :- கடுகு, உளுந்து , சீரகம் – தலா அரை டீஸ்பூன், பெருங்காய்த்தூள் சிறிது.

செய்முறை:- பாசிப்பருப்பைக் களைந்து அரைமணி நேரம் ஊறவைக்கவும். கொத்துமல்லித்தழையைச் சுத்தம் செய்து தண்டோடு சேர்த்துப் பொடிப் பொடியாக அரிந்து பாசிப்பருப்பில் சேர்க்கவும். தக்காளியையும், கத்திரிக்காயையும், பெரியவெங்காயத்தையும் பொடியாக அரிந்து போடவும். பச்சைமிளகாயை இரண்டாக வகிர்ந்து போடவும். மஞ்சள்பொடி, சாம்பார்பொடி சேர்த்து அரை கப் நீரூற்றிப் ப்ரஷர் பானில் போட்டு இரண்டு விசில் வைத்து இறக்கி மசிக்கவும். இதில் புளியை அரைகப் நீரில் கரைத்து ஊற்றி உப்புச் சேர்த்துக் கொதிக்க விடவும். எண்ணெயில் கடுகு, உளுந்து, சீரகம் தாளித்துப் பெருங்காயத்தூளைத் தூவவும். சாதத்தில் போட்டுப் பிசைந்தும் சாப்பிடலாம். 

தோசை, இட்லிக்கும் தொட்டுக்கொள்ள ஏற்றது. வயிற்றுப் பிரச்சனைகளைத் தீர்க்கும். செரிமானம் கொடுத்துப் பசியைத் தூண்டும்.

 

நாரத்தைக் கட்டி

நாரத்தைக் கட்டி

தேவையானவை:- நரம்பு நீக்கிய நாரத்தை இலை, எலுமிச்சை இலை, புளியங்கொழுந்து, விளாங்கொழுந்து – தலா ஒரு கைப்பிடி. வரமிளகாய் – 4, பெருங்காயம் – 1 துண்டு, உப்பு – அரை டீஸ்பூன், புளி – 3 சுளை.

செய்முறை:- புளியை வெறும் வாணலியில் வறுத்து எடுக்கவும். இத்துடன் வரமிளகாய், உப்பு, பெருங்காயம் போட்டு மிக்ஸியில் பொடிக்கவும். கடைசியாக நாரத்தை இலை, எலுமிச்சை இலை, விளாங்கொழுந்து, புளியங்கொழுத்து போட்டு நன்கு அரைத்து சின்னச் சின்ன உருண்டைகளாக உருட்டி வைக்கவும். தயிர் சாதத்துடன் தொட்டுக் கொள்ள ஏற்றது. 

பசி மந்தம், உப்புசத்தைப் போக்கும்.

 

கருவேப்பிலைச் சட்னி

கருவேப்பிலைச் சட்னி

தேவையானவை:- கொழுந்து கருவேப்பிலை – 1கட்டு, சின்ன வெங்காயம் – 10, வரமிளகாய் – 4, உப்பு – அரை டீஸ்பூன், புளி – 2 சுளை, தாளிக்க:- எண்ணெய் – 2 டீஸ்பூன், கடுகு, உளுந்து தலா அரை டீஸ்பூன்.

செய்முறை:- கொழுந்து கருவேப்பிலையோடு வரமிளகாய், உப்பு, புளி சேர்த்து மைய அரைத்து அரை கப் நீரில் கரைத்து வைக்கவும். சின்ன வெங்காயத்தை உரித்து வட்ட வட்டமாக நறுக்கவும். எண்ணெயைக் காயவைத்துக் கடுகு, உளுந்து தாளித்து வெங்காயத்தை நன்கு வதக்கவும். இதில் அரைத்த கருவேப்பிலை விழுதைக் கொட்டி ஒரு கொதி வந்ததும் இறக்கவும். இட்லி தோசைக்குத் தொட்டுக் கொள்ளலாம். 

வயிறு மந்தம், பசியின்மையைப் போக்கும். செரிமானம் கொடுக்கும்.

 

சீரகக் கொழுக்கட்டை

சீரகக் கொழுக்கட்டை

தேவையானவை:- பச்சரிசி/சாப்பாட்டு அரிசி – 1 கப், சீரகம்- 1 டீஸ்பூன், உப்பு – அரை டீஸ்பூன்.

செய்முறை:- பச்சரியை அல்லது சாப்பாட்டு அரிசியை ஊறவைத்து உலர்த்தி அரைத்துப் பொடியாக்கிச் சலித்து வைக்கவும். இதில் ஒரு டீஸ்பூன் சீரகத்தைக் கசக்கிச் சேர்த்து உப்புப் போட்டு சிறிது வெந்நீர் தெளித்துப் பிசையவும். சீடைக்காய்கள் போல உருட்டியும், பட்டன்கள் போலத் தட்டியும் வைத்துக் கொள்ளவும். ஒரு பெரிய பாத்திரத்தில் நாலு கப் நீரைக் கொதிக்க வைக்கவும். அது கொதிக்கும்போது இந்தக் கொழுக்கட்டைகளைச் சிறிது சிறிதாகத் தூவி வரவும். கரண்டி போட்டுக் கிண்டக் கூடாது. எல்லாக் கொழுக்கட்டைகளையும் போட்டு அவை வெந்து மேலெழும்பியதும் அவற்றை அந்த நீரோடு சேர்த்தும் சாப்பிடலாம். அல்லது வடிகட்டியும் சாப்பிடலாம். 

டைபாய்டு, மஞ்சள் காமாலை போன்றவற்றின் போது சாப்பிட ஏற்றது. 

 

மருந்துக் குழம்பு

மருந்துக் குழம்பு

தேவையானவை:- சுக்கு – 1 துண்டு, மிளகு – ஒரு டீஸ்பூன், திப்பிலி – 1 துண்டு, அதிமதுரம் -1 துண்டு, சித்திரத்தை – 1 துண்டு, சீரகம்- 1 டீஸ்பூன், வரமல்லி – இரண்டு டீஸ்பூன் , சின்ன வெங்காயம் -15, பூண்டு – 10 பல், தக்காளி – 1, உப்பு – ஒரு டீஸ்பூன், புளி – 1 நெல்லி அளவு, மஞ்சள்தூள் – 1 சிட்டிகை, நல்லெண்ணெய் – 1 டேபிள் ஸ்பூன்.

செய்முறை:- சுக்கு, திப்பிலி, அதிமதுரம், சித்திரத்தையை வெறும் வாணலியில் வறுத்து இடித்துப் பொடிக்கவும். மிளகு, சீரகம், தனியாவையும் வறுத்துப் பொடிக்கவும். அடி கனமான பாத்திரத்தில் நல்லெண்ணெய் ஊற்றி சுத்தம் செய்த சின்னவெங்காயம், பூண்டு, தக்காளியைப் போட்டு நன்கு வதக்கவும். இதில் உப்புப் புளியைக் கரைத்து ஊற்றிக் கொதிக்க விடவும். கொதிக்கும்போது மஞ்சள்தூள், வறுத்து அரைத்த பொடிகளைச் சேர்த்து எண்ணெய் பிரியும்வரை வைக்கவும். கருவேப்பிலை போட்டு இறக்கவும். 

சூடாக சாதத்தில் போட்டுச் சாப்பிட சளியை நீக்கும். 

 

கடாரங்காய் சாதம்

கடாரங்காய் சாதம்

தேவையானவை:- கடாரங்காய் – 2, வடித்த சாதம் – ஒரு கப், மஞ்சள்தூள் – ஒரு சிட்டிகை, உப்பு – அரை டீஸ்பூன், தாளிக்க:- கடுகு, உளுந்து கடலைப்பருப்பு – தலா ஒரு டீஸ்பூன், வரமிளகாய் – 1, பச்சை மிளகாய் – 1, கருவேப்பிலை – 1 இணுக்கு.

செய்முறை:- கடாரங்காயை இரண்டாக நறுக்கிச் சாறுபிழிந்து உப்பும் மஞ்சள் பொடியும் போட்டு வைக்கவும். எண்ணெயைக் காயவைத்துக் கடுகு, உளுந்து, கடலைப்பருப்புத் தாளித்து இரண்டாகக் கிள்ளிய வரமிளகாய், பச்சை மிளகாய், கருவேப்பிலை சேர்க்கவும். நன்கு வறுபட்டதும் கடாரங்காய்ச் சாறை ஊற்றி அடுப்பை அணைக்கவும். ஆறியதும் இதில் சாதத்தைப் போட்டுக் கிளறவும். 

கடாரங்காய் பித்தம் போக்கும். பசியைத் தூண்டும்.

வெந்தயத் தோசை

வெந்தயத் தோசை

தேவையானவை:- இட்லி அரிசி – 2 கப், வெந்தயம் – கால் கப், உப்பு – ஒரு டீஸ்பூன்.

செய்முறை:- இட்லி அரிசியையும், வெந்தயத்தையும் தனித்தனியாகக் கழுவி ஊறவைக்கவும். இரண்டு மணி நேரத்துக்குப் பிறகு முதலில் வெந்தயத்தை முக்கால் பங்கு அரைத்து அதன் பின் இட்லி அரிசியையும் சேர்த்து அரைக்கவும். உப்புச் சேர்த்துக் கரைத்து எட்டுமணி நேரம் புளிக்க விடவும். தோசைக்கல்லை எண்ணெய்த் துணியால் துடைத்துத் தோசைகளாகச் சுட்டுப் பூண்டுப் பொடியோடு பரிமாறவும். 

இது டயபடிஸ் உள்ளவர்கள் சாப்பிட ஏற்றது.

 

பருப்புத் துவையல்

பருப்புத் துவையல்

தேவையானவை:- துவரம்பருப்பு – 2 டேபிள் ஸ்பூன், தேங்காய் – 1 சில், வரமிளகாய் – 1, உப்பு – கால் டீஸ்பூன், பூண்டு – 1 பல்

செய்முறை:- துவரம்பருப்பை வெறும் வாணலியில் வாசம்வரும்வரை வறுக்கவும். இத்துடன் மிளகாயையும் சேர்த்து வறுக்கவும். ஆறியதும் தேங்காய்ச்சில், உப்புப் போட்டு மிக்ஸியில் கொரகொரப்பாக அரைக்கவும். கடைசியாக உரித்த பூண்டைப் போட்டு ஒரு சுற்று சுற்றி எடுக்கவும். 

இது ரசம்சாதம் & உடைகஞ்சிக்குத் தொட்டுக் கொள்ள ஏற்றது. காய்ச்சலின் போது ஏற்படும் நாக்கசப்பை நீக்கும்.

முட்டைக்கோஸ் கூட்டு

முட்டைக்கோஸ் கூட்டு

தேவையானவை:-முட்டைக்கோஸ் – 200 கி, துவரம்பருப்பு + பாசிப்பருப்பு – தலா 2 டீஸ்பூன், பச்சைமிளகாய் – 1, பெரியவெங்காயம் – பாதி, உப்பு – அரை டீஸ்பூன், தாளிக்க:- எண்ணெய் – ஒரு டீஸ்பூன், உளுந்து, சீரகம் – தலா அரை டீஸ்பூன், கருவேப்பிலை – 1 இணுக்கு.

செய்முறை:- முட்டைக்கோஸையும் வெங்காயத்தையும் நைஸாக அரியவும். ஒரு ப்ரஷர் பானில் துவரம்பருப்பு, பாசிப்பருப்பைப் போட்டு அரை கப் நீரூற்றி, வகிர்ந்த பச்சைமிளகாய், அரிந்த கோஸ், வெங்காயத்தைப் போடவும். இரண்டு விசில் வந்ததும் இறக்கி உப்பு சேர்த்து உளுந்து சீரகம், கருவேப்பிலை தாளித்து மசித்துவிட்டு உபயோகிக்கவும். பருப்புகளை அரைமணி முன்னேயே ஊறப்போட்டால் ஒரு விசில் வைத்தால் போதும். இது குடல் புண்ணை ஆற்றும்.

 

பூண்டுக் கஞ்சி

பூண்டுக் கஞ்சி

தேவையானவை:- பொன்னி பச்சரிசி – ஒரு கப், பூண்டு – 10 – 15 பல், வெந்தயம் – அரை டீஸ்பூன், தேங்காய்ப் பால் – கால் கப். உப்பு – அரை டீஸ்பூன்.

செய்முறை:- அரிசியைக் களைந்து அதில் உரித்த பூண்டுகள், வெந்தயம் சேர்த்து இரண்டரைக் கப் நீரூற்றிக் குக்கரில் இரண்டு விசில் வரும்வரை வேகவிடவும். வெந்ததும் இறக்கி நன்கு மசித்து உப்பும், தேங்காய்ப்பாலும் சேர்த்துக் கலந்து பரிமாறவும். 

இது வாய்ப்புண், வயிற்றுப்புண்ணைக் குணப்படுத்தும்.