13. வெள்ளை முள்ளங்கிச் சட்னி

13. வெள்ளை முள்ளங்கிச் சட்னி.

 

தேவையானவை:- வெள்ளை முள்ளங்கி பெரிது – 1, தேங்காய் – 2 டேபிள் ஸ்பூன், உளுந்தம்பருப்பு, கடலைப்பருப்பு – தலா 2 டீஸ்பூன், சீரகம்- அரை டீஸ்பூன், வரமிளகாய் – 4, பெரிய வெங்காயம் – 1, புளி – 2 சுளை, கருவேப்பிலை – 1 இணுக்கு, உப்பு – அரை டீஸ்பூன் , எண்ணெய் – 1 டேபிள் ஸ்பூன். கடுகு – அரை டீஸ்பூன்.

 

செய்முறை:- வெள்ளை முள்ளங்கியைத் திருகி சிறிது எண்ணெய் ஊற்றி நன்கு வதக்கவும். அதிலேயே வெங்காயத்தையும் நறுக்கிப் போட்டு வதக்கி ஆறவைக்கவும். அதே கடாயில் இரு டீஸ்பூன் எண்ணெய் ஊற்றி சீரகம், கடலைப் பருப்பு, உளுந்தம்பருப்பு, வரமிளகாய் போட்டு வறுக்கவும். இதில் தேங்காய், புளி, உப்பு, போட்டு வதக்கி ஆறவைத்து இரண்டையும் சேர்த்து அரைக்கவும். ஒரு டீஸ்பூன் எண்ணெயில் கடுகு கருவேப்பிலையைத் தாளித்து சட்னியில் சேர்க்கவும்.  

 

12. மாகாளிக் கிழங்கு ஊறுகாய்

12. மாகாளிக் கிழங்கு ஊறுகாய்.

 

தேவையானவை:- மாகாளிக்கிழங்கு – கால்கிலோ, புளித்த தயிர் – 1 கப், கடுகு – 1 டீஸ்பூன், உப்பு – 1 டேபிள் ஸ்பூன், வரமிளகாய் – 8, விரலி மஞ்சள் – சிறு துண்டு.

 

செய்முறை:- மாகாளிக்கிழங்கை நன்கு கழுவி ஊறவைத்துத் தோலை நீக்கவும். தண்டையும் நீக்கி அரை இஞ்ச் துண்டுகளாக்கவும். கடுகு, விரலிமஞ்சள், வரமிளகாயை அரைத்து உப்பு, தயிர் சேர்த்து நன்கு கலக்கி ஊறவைக்கவும்.

 

11. ஆலு புஜியா

11. ஆலு புஜியா.

 

தேவையானவை:- உருளைக்கிழங்கு – 3 வேகவைத்து உரித்து மசித்தது. கடலை மாவு – அரை கப், உப்பு, மிளகாய்த்தூள் – தலா அரை டீஸ்பூன், பெருங்காயம் – 1 சிட்டிகை, எலுமிச்சை சாறு – அரை டீஸ்பூன், மஞ்சள்தூள் – கால் டீஸ்பூன், எண்ணெய் – பொரிக்கத் தேவையான அளவு.

 

செய்முறை:- உருளைக்கிழங்குடன் கடலை மாவு உப்பு மிளகாய்த்தூள் மஞ்சள்தூள், எலுமிச்சை சாறு சேர்த்து நன்கு மென்மையாகப் பிசையவும். எண்ணெயை மிதமாகக் காயவைக்கவும். ஓமப்பொடி அச்சில் எண்ணெய் தடவி மாவைப் போட்டு வட்டமாகப் பிழிந்து மஞ்சள் கலரிலேயே வேகவைத்து எடுத்து வைத்து லேசாக நொறுக்கி விடவும்

 

10. பிடிகருணை மசியல்

10. பிடிகருணை மசியல்.

 

தேவையானவை :- கருணைக்கிழங்கு – கால் கிலோ, பச்சை மிளகாய் – 4, புளி - 1 நெல்லி அளவு, மஞ்சள் தூள் – 1 சிட்டிகை, பெரிய வெங்காயம் – 1 பொடியாக அரியவும். உப்பு – அரை டீஸ்பூன், தாளிக்க :- கடுகு – அரை டீஸ்பூன், உளுந்து – ஒரு டீஸ்பூன், சோம்பு - கால் டீஸ்பூன், கருவேப்பிலை – 1 இணுக்கு, எண்ணெய் – 4 டீஸ்பூன்.

 

செய்முறை :- கருணைக்கிழங்கை நன்கு கழுவி குக்கரில் வேகப்போட்டு தோலுரித்து மசித்துக் கொள்ளவும். எண்ணெயைக் காயவைத்து கடுகு  போட்டு வெடித்ததும் உளுந்து போட்டு சிவந்ததும்,  கருவேப்பிலை போட்டு பச்சை மிளகாய்களை நான்காக கீறிப்போடவும். லேசாக வதங்கியதும் பெரியவெங்காயத்தை தண்ணீர் போல வதக்கவும். இதில் உப்பு , மஞ்சள் பொடி போட்டு மசித்த கருணையைப் போடவும். உப்பு புளியை அரை கப் நீரில் நன்கு கரைத்து ஊற்றவும். அடிக்கடிக் கிளறிவிட்டு நன்கு  சுருண்டு வரும்போது  இறக்கவும். 

 

9. பீட்ரூட் கோளா

9. பீட்ரூட் கோளா.

 

தேவையானவை :- பீட்ரூட் - 2, துவரம் பருப்பு - அரை உழக்கு, பெரிய வெங்காயம் - 1, அரைக்க :- வரமிளகாய் - 5, சோம்பு - அரை டீஸ்பூன், உப்பு - அரை டீஸ்பூன், எண்ணெய் - 1 டேபிள் ஸ்பூன், தாளிக்க :- கடுகு, உளுந்து,  - தலா ஒரு டீஸ்பூன். சோம்பு - கால் டீஸ்பூன்.

 

செய்முறை:- துவரம்பருப்பைக் களைந்து ஒரு மணி நேரம் ஊறவைக்கவும். பீட்ரூட்டைத் தோல் சீவித் துண்டுகளாக்கி மிக்ஸியில் அரைத்து வைக்கவும். பெரிய வெங்காயத்தைப் பொடியாக அரியவும்.  ஊறவைத்த பருப்பை நீரைக் களைந்து மிளகாய், சோம்புடன் பெரு பெருவென அரைத்து வைக்கவும். எண்ணெயைக் காயவைத்துக் கடுகு உளுந்து சோம்பு தாளித்து பெரிய வெங்காயம் பீட்ரூட்டைப் போட்டு சிறிது நேரம் வதக்கவும். அதில் அரைத்த பருப்பு விழுதையும் போட்டு கிளறவும். சிம்மில் வைத்து மூடி போட்டு அவ்வப்போது கிளறி கால் மணி நேரம் வேகவைத்து உதிரியானதும் இறக்கவும்.

8. ஒடியல் கூழ்

8. ஒடியல் கூழ்.

 

தேவையானவை:- பனங்கிழங்கு மாவு – இரண்டு கப், அரிசி, உளுந்து தலா – 1 டேபிள் ஸ்பூன், தட்டைப் பயித்தங்காய் – 6, பலாக் கொட்டை – 10, பூசணிக்காய் – ஆறு துண்டு, மரவள்ளிக்கிழங்கு – 1, முருங்கை இலை – ஒரு கைப்பிடி, உப்பு – 2 டீஸ்பூன், புளி – ஒரு நெல்லி அளவு, மஞ்சள் தூள் – 1 சிட்டிகை, மிளகு, சீரகம் – தலா ஒரு டீஸ்பூன், வரமிளகாய் – 4, சின்ன வெங்காயம் – 4.

 

செய்முறை:- ஒடியல் மாவை நீரூற்றிக் கலந்து ஊறவைக்கவும். தட்டைப் பயித்தங்காய், பலாக்கொட்டை, பூசணிக்காய் மரவள்ளிக்கிழங்கை சிறு துண்டுகளாக்கவும். அரிசி உளுந்தைக் கழுவி நான்கு கப் நீரூற்றி வேகவிடவும். பாதி வெந்ததும் காய்களைச் சேர்க்கவும். காய்களும் வெந்ததும் உப்புப் புளிக் கரைத்து ஊற்றவும். மிளகு, சீரகம், வரமிளகாய், சின்ன வெங்காயத்தை அரைத்துச் சேர்க்கவும். ஒடியல் மாவின் நீரை வடித்துவிட்டுச் சேர்த்து முருங்கைக் கீரையையும் போட்டுப் பத்து நிமிடம் வெந்ததும் இறக்கவும்.

 

7. மரவள்ளிக்கிழங்கு புட்டிங்

7. மரவள்ளிக்கிழங்கு புட்டிங்.

 

தேவையானவை:- மரவள்ளிக்கிழங்கு – கால் கிலோ, பால் – அரை லிட்டர், சீனி – 200 கி, மில்க் மெய்ட் – 2 டேபிள் ஸ்பூன், சைனா கிராஸ் – 50 கி

 

செய்முறை:- சைனா கிராஸை சிறிது வெந்நீர் ஊற்றி ஊறவைக்கவும். மரவள்ளிக்கிழங்கைத் தோல் சீவித் துண்டுகளாக்கி வேகவைத்து நீரை வடித்து மசித்து வைக்கவும். பாலைக் காய்ச்சி சீனி சேர்த்துக் கொதித்ததும் மில்க்மெய்டையும் ஊறவைத்த சைனா கிராஸையும் சேர்த்து நன்கு கரையவிடவும். இதை மசித்த மரவள்ளிக்கிழங்கில் ஊற்றி நன்கு கலந்து விட்டு ஒரு ட்ரேயில் ஊற்றி ஆறு மணி நேரம் ஃபிரிட்ஜில் குளிரவைக்கவும். இறுகியவுடன் எடுத்து வெட்டிப் பரிமாறவும்.  

 

 

6. சர்க்கரை வள்ளிக் கிழங்குப் பொடிமாஸ்

6. சர்க்கரை வள்ளிக் கிழங்குப் பொடிமாஸ்.

 

தேவையானவை :- சர்க்கரை வள்ளிக்கிழங்கு-  4, சின்ன வெங்காயம் - 6, பச்சை மிளகாய் - 1, உப்பு - கால் டீஸ்பூன்,  தாளிக்க - எண்ணெய் - 2 டீஸ்பூன். கடுகு - அரை டீஸ்பூன், உளுந்து - ஒரு டீஸ்பூன், கருவேப்பிலை - 1 இணுக்கு.

 

 

செய்முறை :- சர்க்கரை வள்ளிக்கிழங்குகளை வேகவைத்துத் தோலுரிக்கவும். புட்டுபோல உதிர்த்துக் கொள்ளவும். சின்ன வெங்காயம் பச்சை மிளகாயைப் பொடிப்பொடியாக நறுக்கவும். கடாயில் எண்ணெயைக் காயவைத்துக் கடுகு போட்டு வெடித்ததும் உளுந்து போட்டுச் சிவந்ததும் பச்சைமிளகாய், வெங்காயம் கருவேப்பிலையைத் தாளிக்கவும். ஓரிரு நிமிடங்கள் வதக்கியபின் உதிர்த்த சர்க்கரைவள்ளிக்கிழங்கையும் உப்பையும் சேர்க்கவும்.  நன்கு கலக்கி கிளறி இறக்கவும்.

5. வள்ளிக்கிழங்கு பொரியல்

5. வள்ளிக்கிழங்கு பொரியல்.

 

தேவையானவை:- வள்ளிக்கிழங்கு - 1 துண்டு, மஞ்சள் பொடி - 1 சிட்டிகை., எண்ணெய் - 1 டீஸ்பூன், கடுகு - 1 டீஸ்பூன், உளுந்து - 1 டீஸ்பூன், வரமிளகாய் – 1, கருவேப்பிலை - 1 இணுக்கு, உப்பு - 1/2 டீஸ்பூன்.

 

 

செய்முறை :- வள்ளிக்கிழங்கைத் தோல் சீவி துண்டுகளாக நறுக்கி நன்கு கழுவவும். உப்பும் மஞ்சள் பொடியும் சேர்த்து வேகவிடவும். மென்மையானதும் வடிகட்டவும். பானில் எண்ணெயைக் காயவைத்துக் கடுகு போட்டு வெடித்ததும் உளுந்துபோட்டு சிவந்ததும்., கருவேப்பிலை., வரமிளகாய் தாளிக்கவும். பின் கிழங்கை சேர்த்து தேவையான உப்பு போட்டு நன்கு கிளறி இறக்கவும்.

 

4. சேப்பங்கிழங்கு சாப்ஸ்

4. சேப்பங்கிழங்கு சாப்ஸ்.

 

தேவையானவை :- சேப்பக்கிழங்கு – அரை கிலோ, எலுமிச்சை சாறு – அரை டீஸ்பூன், கெட்டி தேங்காய்ப் பால் – முக்கால் கப், அரிசி மாவு – ஒரு டேபிள்ஸ்பூன், மைதா – கால் கப், சோள மாவு – கால் கப் , மிளகாய்த்தூள் – ஒரு டீஸ்பூன், உப்பு – அரை டீஸ்பூன், ரெட் ஃபுட் கலர் – ஒரு சிட்டிகை, எண்ணெய் – பொறிக்கத் தேவையான அளவு.

 

செய்முறை :- சேப்பங்கிழங்கை வேகவைத்து தோலுரித்து இரண்டாக நீளவாக்கில் நறுக்கி எலுமிச்சை சாற்றைப் பிழிந்து அரிசி மாவில் புரட்டி வைக்கவும். தேங்காய்ப் பாலில் மைதா, சோளமாவு, மிளகாய்த்தூள், உப்பு, ரெட் ஃபுட் கலர் சேர்த்து கட்டிகள் இல்லாமல் திக்காக கரைத்து வைக்கவும். எண்ணெயைக் காயவைத்து சேப்பங்கிழங்குகளை மைதா கலவையில் நனைத்து பொறித்தெடுக்கவும்.