சன்னா பகோடா - CHANNA BAKODA.

சன்னா பகோடா :-

தேவையானவை:- வெள்ளைக் கொண்டைக் கடலை – 1 கப், சீரகம் – அரை டீஸ்பூன், இஞ்சி – 1 இன்ச் துண்டு, பச்சை மிளகாய் – 1, மிளகாய்த்தூள் – கால் டீஸ்பூன், பெருங்காயம் – 1 சிட்டிகை, கொத்துமல்லித்தழை – சிறிது, உப்பு – கால் டீஸ்பூன், எண்ணெய் – பொரிக்கத் தேவையான அளவு.

செய்முறை:- வெள்ளைக் கொண்டைக் கடலையை 8 மணி நேரம் ஊறவைக்கவும். ஊறியதும் நீரை வடித்து சீரகம் இஞ்சி பச்சை மிளகாய் சேர்த்து கெட்டியாக கொரகொரப்பாக மிக்ஸியில் அரைக்கவும். இதில் மிளகாய்த்தூள், பெருங்காயத்தூள், பொடியாக அரிந்த கொத்துமல்லித்தழைபோட்டுப் பிசைந்து எண்ணெயைக்காயவைத்து பகோடாக்களாகப் பொரித்து எடுத்து நிவேதிக்கவும்.

கவுனரிசி லட்டு:- KAVUNARISI LADDU.

கிருஷ்ணர்

கவுனரிசி லட்டு:-

தேவையானவை:- கவுனரிசி மாவு – 1 கப், பொட்டுக்கடலை மாவு -1 கப், பாதாம் பொடி – அரை கப் , தூள் வெல்லம் – ஒன்றரை கப், நெய் – அரை கப், ஏலப்பொடி – ஒரு சிட்டிகை, முந்திரி 10.

செய்முறை:- முந்திரியை நெய்யில் வறுத்து வைக்கவும். சிறிது நெய்யில் கவுனரிசி மாவை வாசம் வரும்வரை வறுக்கவும். அடுப்பை அணைத்து சூட்டிலேயே பொட்டுக்கடலை மாவு, பாதாம் பொடி, தூள் வெல்லத்தைச் சேர்க்கவும். ஏலப்பொடி போட்டு நெய்யை உருக்கி ஊற்றி லட்டுகளாக உருண்டைகள் பிடிக்கவும்.

சிறுதானிய அப்பம்:- SIRUDHANYA APPAM,

சிறுதானிய அப்பம்:-

தேவையானவை:- வரகு, சாமை, தினை , கம்பு, கேழ்வரகு மாவு – தலா கால் கப், வெல்லம் – 1 கப், ஏலத்தூள் – 1 சிட்டிகை, தேங்காய்த் துருவல் – 1 டேபிள் ஸ்பூன், எண்ணெய் –பொரிக்கத் தேவையான அளவு.

செய்முறை: எல்லா மாவையும் லேசாக வறுத்து ஏலத்தூள் தேங்காய்த்துருவல் சேர்த்துக் கலக்கவும். வெல்லத்தைப் பாகு வைத்து மாவில் ஊற்றி தோசை மாவு பதத்தில் கரைக்கவும். சிறிது நேரம் ஊறியபின் எண்ணெயைக் காயவைத்து அப்பங்களாக ஊற்றி நிவேதிக்கவும்.

அமிர்த கலசம்:- AMIRTHA KALASAM.

பெருமாள்

அமிர்த கலசம்:-

தேவையானவை:- பச்சரிசி மாவு – 2 கப், மிளகு – 2 டீஸ்பூன், வெல்லம் – ஒரு கப், சீரகம் – கால் டீஸ்பூன், நெய் – கால்கப்.

செய்முறை:- வெல்லத்தை இளம் பாகு வைத்து சீரகம்,மிளகை ஒன்றிரண்டாகப் பொடித்துப் போடவும். நெய்யைக் காய்ச்சி ஊற்றி பச்சரிசி மாவைப் போட்டு நன்கு கலக்கவும். சிறிதுநேரம் ஊறியவுடன் சிறு டம்ளர்களில் நெய் தடவி மாவை நிரப்பி வேகவைத்து எடுத்து நிவேதிக்கவும்.

இருபருப்பு வடை. - DHAL VADA.

இருபருப்பு வடை.

தேவையானவை:- கடலைப்பருப்பு – 1 கப், வெள்ளை உருண்டை உளுந்தம் பருப்பு -1 கப், பச்சைமிளகாய் – 2, வரமிளகாய்- 2, கருவேப்பிலை, கொத்துமல்லி – தலா ஒரு கைப்பிடி, உப்பு – அரை டீஸ்பூன். எண்ணெய்- பொரிக்கத் தேவையான அளவு.

செய்முறை:- கடலைப்பருப்பையும் உளுந்தம் பருப்பையும் தனித்தனியாக ஊறவைக்கவும். ஊறியதும் மிக்ஸியில் பச்சைமிளகாய், வரமிளகாயை உப்பு சேர்த்து அரைத்து உளுந்தையும் கடலைப்பருப்பையும் போட்டு ஒன்றிரண்டாக அரைத்து எடுக்கவும். அதில் கருவேப்பிலை கொத்துமல்லியைப் பொடியாக அரிந்து போட்டு இளக்கமாகத் தட்டி எண்ணெயைக் காயவைத்துப் பொரித்தெடுத்து நிவேதிக்கவும்.