19. பாதாம் பழப் பாயாசம் :- FRUITS BADAM GHEER,

19. பாதாம் பழப் பாயாசம் :-

தேவையானவை:- பாதாம் – 20, பால் – அரை லிட்டர், சர்க்கரை – 1 டேபிள் ஸ்பூன். பழக்கலவை – ஆப்பிள், பைனாப்பிள், சப்போட்டா, வாழைப்பழம் – அரை கப், நெய்- அரை டீஸ்பூன்.

செய்முறை:- பாதாமை ஊறவைத்துத் தோலுரித்து அரைத்துப் பாலில் போட்டு நன்கு கொதிக்கவிடவும். சர்க்கரை சேர்த்துக் கரைந்ததும் இறக்கி ஆறவிடவும். இதில் பழக்கலவையை நெய்யில் வதக்கிப் போட்டுக் குளிரவைத்துப் பரிமாறவும்.

18. பப்பாளி வத்தல் குழம்பு :- PAPAYA GRAVY

18. பப்பாளி வத்தல் குழம்பு :-

தேவையானவை:- பப்பாளி – 15 துண்டுகள், சின்னவெங்காயம், பூண்டு – தலா – 10.  தக்காளி – 1, புளி – எலுமிச்சை அளவு, உப்பு – 1 டீஸ்பூன், மிளகாய்த்தூள் – 2 டீஸ்பூன், மல்லித்தூள் – 4 டீஸ்பூன், மஞ்சள் தூள் – 1 சிட்டிகை,  தாளிக்க :- எண்ணெய் – 1 டேபிள் ஸ்பூன், கடுகு, உளுந்து, சீரகம், வெந்தயம் – தலா அரை டீஸ்பூன். கட்டி பெருங்காயம் – 1 துண்டு.

செய்முறை:- புளியை ஊறவைத்து உப்பு, மிளகாய்த்தூள், மல்லித்தூள், மஞ்சள்தூள் போட்டு வைக்கவும். வெங்காயம் பூண்டைத் தோலுரித்து நறுக்கவும். தக்காளியைத் துண்டுகளாக்கவும். எண்ணெயைக் காயவைத்துக் கடுகு, உளுந்து, சீரகம், வெந்தயம், பெருங்காயம் தாளித்து வெங்காயம் தக்காளி பூண்டைப் போட்டு வதக்கவும். நன்கு சுருள வதங்கியதும் கரைத்த புளித்தண்ணீரை ஊற்றவும். கொதித்து சுண்டி வரும்போது பப்பாளித் துண்டுகளைப் போட்டு ஒரு கொதி வந்ததும் இறக்கவும். 

17. தேன்கதலி அப்பம்:- THENKATHALI APPAM

17. தேன்கதலி அப்பம்:-

தேவையானவை:- தேன்கதலிப் பழம் – 2, மைதா/கோதுமை – ஒரு கப், சர்க்கரை – கால் கப், உப்பு – 1 சிட்டிகை, பேக்கிங் பவுடர் – 1 சிட்டிகை, ஏலத்தூள் – 1 சிட்டிகை. எண்ணெய் – பொரிக்கத்தேவையான அளவு.

செய்முறை:- நன்கு கனிந்த தேன்கதலிப் பழங்களை உரித்து ஒரு பௌலில் போட்டு நன்கு மசிக்கவும். இதில் மைதா, உப்பு, பேக்கிங் பவுடர், ஏலத்தூள்,சர்க்கரை போட்டு நன்கு கலந்து தண்ணீரை சிறிது சிறிதாகத் தெளித்து நன்கு பிசையவும். பஜ்ஜி மாவு பதத்திற்கு வந்ததும் தண்ணீர் சேர்க்க வேண்டாம். இதைப் பத்து நிமிடம் ஊறவைத்து கடாயில் எண்ணெயைக் காயவைத்து ஒவ்வொன்றாக ஊற்றவும், உப்பியதும் திருப்பி வேகவைத்துப் பொன்னிறமாக எடுக்கவும்.

16. தக்காளிப்பழ ஊத்தப்பம் :- TOMATO OOTHAPPAM

16. தக்காளிப்பழ ஊத்தப்பம் :-

தேவையானவை:- தோசை மாவு – 2 கரண்டி, தக்காளிப்பழம் – 2, மிளகு சீரகத்தூள் – 1 டீஸ்பூன், உப்பு – கால் டீஸ்பூன், எண்ணெய் – 1 டேபிள்ஸ்பூன்.

செய்முறை:- தக்காளிப்பழத் துண்டுகளை வட்ட வட்டமாக நறுக்கவும். தோசைக்கல்லைக் காயவைத்து ஒரு கரண்டி மாவை ஊத்தப்பமாக ஊற்றி தக்காளிப்பழத் துண்டுகளைப் பரப்பவும். இதில் உப்பு, மிளகு சீரகத்தூள் தூவி சுற்றிலும் எண்ணெய் விட்டு மூடி போட்டு வேகவிடவும். நன்கு வெந்ததும் திருப்பிப் போட்டுப் பொன்னிறமானதும் எடுத்து சட்னிகளுடன் பரிமாறவும்.

15. செவ்வாழைப்பழ புட்டிங் :- RED PLANTAIN PUDDING.

15. செவ்வாழைப்பழ புட்டிங் :-

தேவையானவை:- செவ்வாழைப்பழம் – 1. தேங்காய்த்துருவல் – கால் கப்,  தேன் – 2 ஸ்பூன், ஏலப்பொடி – கால் டீஸ்பூன்.

செய்முறை:- செவ்வாழைப்பழத்தைத் தோலுரித்து வட்டத் துண்டுகளாக்கவும். இதில் தேங்காய்த்துருவலை வைத்துத் தேன் ஊற்றி ஏலப்பொடி தூவிப் பரிமாறவும்.